Partido CURPA ta boga pa revoca y reforma leynan contra principio di bon gobernacion

Partido CURPA (Cristiannan Uni Reforzando Potencial di Aruba) ta cla pa eleccion dia 6 di december 2024 y manera tur otro partido a presenta su plan di partido pa siguiente periodo di gobernacion. Den su plan e partido ta remarca cu e ta boga pa revoca y reforma tur ley cu ta contra principionan di bon gobernacion pa logra recupera Aruba back.

Den e nan plan di partido CURPA presenta seis sector primordial cu nan lo enfoca riba dje y di cada sector tin diferente aspecto cu tin atencion di e partido. Den e sector di cuido CURPA ta boga pa mas inversion den cuido medico y elimina eigen bijdrage pa pensionadonan. E partido tambe ta para pa reforma of elimina e sistema di AruBIG y ta boga pa duna oido na esnan cu ta traha den cuido.

Pa loke ta trata sector di husticia y seguridad, partido CURPA ta sostene mas capacitacion inovativo pa polis, recluta mas candidato pa bira polis y tambe ta boga pa husticia na Aruba traha di un forma mas preventivo cu represivo. Otro punto cu nan ta menciona ta cu nan desea di aumenta castigo, ta mira e necesidad pa tin mas material pa departamentonan hudicial y tambe kier introduci klokkenluiderswet.

E klokkenluiderswet ta encera ora cu un denunciante ta expone abusonan den un compania of organisacion. Dunadornan di trabou cu tin cincuenta empleado of mas ta obliga di tin un procedura pa denuncia sospechosonan di abuso. E dunado di trabao ta investiga e abuso y tuma medidanan si ta necesario.

Manera tur otro partido, CURPA tambe ta mira e encesidad pa reduci gasto di gobierno, baha debe y traha DAM. E partido ta remarca cu mester pone esnan cu a haci nan mes culpabel responsabel. Nan kier introduci tambe maximo 7 minister den gobierno y esaki no ta exclui vakminister, y nan ta boga pa impuesto mas simpel y husto pa un y tur.

Den su plan di partido CURPA tambe ta inclui cu nan lo kier baha e edad di pensioen na 62 aña y ta resalta cu adultonan mayor mester haya mas beneficio. Alabes nan ta para pa introduci programa pa reintegra ex presonan y ex adictonan den comunidad, lo implementa incentivo pa doñonan di trabou cu sostene esaki y nan ta boga pa un aumento di salario minimo.

Diversificacon di economia tambe ta un punto den e plan di partido d CURPA. Nan ta resalta cu nan kier crea un pilar economico nobo di remedi di tera legal. Nan ta boga pa stimula agricultura rond di Aruba, pa habri mercado di pesca na Aruba y pa cria bestia consumo propio di carni. Ademas nan kier introduci cursonan preparatorio y avansa den agricultura y nan kier legalisa crypto currency.

Por ultimo, partido CURPA tambe ta sostene e pensamento cu mester introduci un solo BTW di 16% y elimina e otro medidanan, nan kier amplia e canasta basico, digitalisa tur producto pa tin un miho control y lo introduci boet mas halto pa negoshinan cu kibra ley.