Dialuna atardi e lider di Partido di Pueblo Arubano (AVP), mr. Mike Eman a realisa un bishita na sede di Vertegenwoordiging Nederland in Aruba (VNO) pa loke el a describi como un encuentro masha fructifero cu e representante di Hulanda na Aruba.
Eman ta considera esaki momentonan importante ya cu e mesun atardi a sali rumbo pa Hulanda unda kier trece diferente punto dilanti cu e obhetivo di habri caminda pa pensamento mas constructivo y un alivio pa e situacion cu nos pais ta aden. Pa AVP ta importante ta continuamente inverti den e relacion cu Reino y p’esey e agenda di e biaha aki ta inclui bishita na amigonan di Aruba na Hulanda y institutonan, manera entre otro, e directiva actual y anterior di e Sociaal Cultureel Plan Bureau di e pais.
E lider di fraccion di AVP a entrega un nota cu e obhetivo y vision di e bishita di caracter politico na e representante di Hulanda y lo haci mescos na Hulanda mes, pa asina ofrece transparencia y confianza. Den e nota ta articula e vision di un reconexion entre e desaroyo economico, e desaroyo politico y e realidad cu nos pais ta bibando. Aspecto di pobresa, adultonan mayor, seguro medico y enseñansa, entre otro. Eman: Den tempo di nos gobernacion Hulanda tabata hopi na altura di aspiracion cu nos tin pa un calidad di bida pa Aruba, pa conecta e cifranan economico na e bienestar general, na e bon comun. P’esey nos tabata tin renobacion di bario, reparatietoeslag, reduccion riba studielening, renobacion di centro di ciudad, mehoracion di poder di compras y mas.”
AVP kier yuda crea e ambiente positivo atrobe caminda por habri porta pa Hulanda participa den pensa hunto cu Aruba, no unicamente riba e presupuesto. Por ehempel, con por mehora e calidad di bida y sigura cu pensionado tin un entrada husto. Despues di publicacionnan di rapportnan manera di Sociaal Cultureel Planbureau y Ombudsman Hulanda a sinti su mes responsabel pa e bestaansminimum. Na Boneiro ta bay subi e salario minimo na practicamente dobel di Aruba. Esey a sosode despues cu rapportnan a bin dilanti danki na un Sociaal Cultureel Plan Bureau. “E ora ey Hulanda tambe lo tin un bista riba e necesidadnan socioeconomico di nos pais; kico ta come y bebe na Aruba y kico ta e deseo di e pueblo,” Eman a indica.
Partido AVP tin un trayectoria di logro cu Hulanda. Durante su mandato TNO a establece na Aruba, KLM a reinicia su vuelonan, Schiphol a fortalece su actividadnan na Aruba y cu nos aeropuerto, mescos cu Porta Amsterdam y Scheepvaart School Rotterdam a haci pa APA, Rietveld Academie cu arte y asina tin muestra cu por traha constructivamente cu Hulanda. Esey cosnan cu a ser logra durante Gobernacion di Minister President Eman, p’esey e tin confianza cu cambio di gobernacion na Aruba por bolbe crea e relacionnan constructivo aki cu Hulanda. Durante e bishita aki, Eman lo tin encuentro cu figuranan cu tabata crucial e tempo ey pa asina reestablece contacto y crea un perspectiva nobo den e relacionnan den Reino.
Eman: “E mision di AVP no ta manera a mira di otro partido politico, bay pa defama otro politico of gobernante; e ta pa inverti den futuro. E fase di transicion cu Hulanda ta aden ta hustamente esun mas fertil pa un vision nobo pa cu e realidad actual, pero tambe con pa pone e bon comun di pueblo como meta,” Eman a accentua algun promer cu e a sali pa Hulanda.
