Den e mundo politico cu e lider di MEP y formado Evelyn Wever Croes ta bibando aden, masha poco bes den historia politido cu Aruba, a wordo mira of a tende di e mentalidad politico aki.

Partido MEP tabatin tres lider desde su fundacion, cuminsando cu Betico Croes den felis memoria, Nelson Orlando Oduber cu a scapa e partido di bati bancarota y awor Evelyn Wever Croes kende a cumpli 10 aña como lider e fin di siman cu ta tras di lomba.

Sinembargo tin un diferencia grandi, un Betico cu ta wordo considera e Libertador di Aruba pa logra e Status Aparte y kende tabatin un forma hopi respetuoso di hiba politica, sigui despues pa un Nelson Oduber kende a tuma e partido over den tempo dificil, converti e partido den e forsa grandi den arena politica for di 2001 te cu 2009 y kende ta sigui gosa di hopi reconocimento pa un carera politico impresionante.

E actual lider di MEP, a sorprende mundo politico den eleccion ultimo caminda como lider di gabinete MEP-POR-RED, e gobierno no a cumpli cu ningun promesa haci na pueblo, no a drecha e calidad di bida di e ciudadanonan, no a reduci prijs di awa, coriente y gasolin manera cu el a priminti di haci.

Su gobierno algun despues di a tuma mando di e pais a dicidid y introduci un serie di medida y cuater aña despues ainda e ta introduciendo mas medida contra pueblo, haciendo e pober mas pober y algun rico mas rico.

Sinembargo apesar di tur esaki, Evelyn den eleccion di dia 25 di juni ultimo a guia su partido MEP na un victoria logrando 9 asiento y a bira e votegetter mas grandi e eleccion superando e lider di AVP.

Ningun hende a spera esey pero esey ta e realidad pero awor den e proceso di formacion, un biaha mas Evelyn ta separa su mes di e otro dos lidernan di MEP prome cune, ora cu el a bira ocupa tres encargo grandi, loke no Betico y tampoco Nel Oduber a logra, esta di ta Prome Minister demisionario, di ta miembro di Parlamento y na mes momento e ta formado di e gobierno nobo.

Diabierna utlimo pa kita e impresion politico cu su persona ta birando un “one woman show” e lider di MEP a dicidi di pone den man di gobernado Boekhoudt, su lista di reparticion di carteranan sperando kisas cu ningun hende lo ripara con ridiculo e reparticion aki ta.

Sinbembargo tin un fabula di hopi tempo pasa cu semper ta ser conta esta cu “spañonan a cambia un pida spiel pa oro” cu e indjannan cu tabata habita e islanan den Caribe.

Esaki ta loke realmente e lider di MEP y formado a haci cu partido RAIZ y cu a ser comenta practicamente den tur skina di comunidad y pa hopi e desmantelacion di e partido aki a inicia caba, hopi mas prome cu e desmantelacion polittico cu e lider di MEP a impone riba partido POR y RED despues di tabatin esakinan como partner den gobernacion.

RAIZ a acepta algun ministerio cu realmente no tin contenido, sigur por ehempel e ministerio riba integridad, ya cu ainda e departamento aki no ta cla completamente y e nombracionnan cu tin den esaki, ta hendenan cu a wordo nombra pa e lider di MEP.

Algun reaccion cu AweMainta a ricibi den curso di ayera riba e carteranan cu Ursell Arends lider di RAIZ a acepta, tin uno cu ta bisa cu loke RAIZ haya for di formado ta un ministerio pa e bay planta mata proximo cuater aña.