E no ta un secreto cu ex-minister di Finanzas, Tico Croes, a wordo condena penalmente pa viola ley di contabilidad y ex-minister di Asuntonan Social, Hubentud y Labor, Paul Croes, a draai un organisacion criminal den Cocolishi durante aproximadamente cuater aña. Ademas, comunidad ta bay haya sa mañan si ex-minister Benny Sevinger ta culpabel pa corupcion y pa acepta soborno of no.

Partido AVP su problema penal y integridad

No solamente ex-minister Tico Croes of Paul Croes bao di AVP a wordo condena penalmente, sino tambe secretaria y tambe prima di Paul Croes, su chauffeur, su coordinadonan y campañadonan di AVP. E mesun structura aki tambe por mira den e caso penal cu tin na e momentonan contra Benny Sevinger. Incluso, e mesun sospechoso cu a wordo condena caba den caso IBIS awor atrobe ta sospechoso penal den caso Avestruz.

Den echonan castigabel cometi ta inclui labamento di placa, aceptacion di soborno, violacion di ley di contabilidad, abuso di poder, participacion den un organisacion criminal structura den Cocolishi, cooperacion y continuacion di un ontheffingenfabriek, mal uso di funcion y tambe mal uso di fundacion di campaña politico pa beneficio personal y hasta sustraccion (verduistering) intencionalmente.

Den tur esaki, te ainda Mike Eman lider di partido no a duna contesta con Fundacion Campaña Mike Eman a haya e cifra di 49.950 dollar of mas pagonan for di Roberto Rincon, ken a acepta su culpabilidad na husticia Mericano pa soborna hendenan na otro paisnan (foreign bribery).

Ryçond Santos do Nascimento ta pidi reforma interno den partido berde

For di algun dia caba, comunidad por scucha y lesa diferente noticianan cu tin di otro miembronan di partido AVP—entre otro, Gerlien Croes—pa loke ta trata integridad. Den esaki, Ryçond Santos do Nascimento ta bin ta bati bel unda e ta pidi pa partido AVP traha riba un reforma interno cu urgencia.

Den un comunicado di prensa data 11 di april 2023, Santos do Nascimento ta señala cu “Echonan di miembronan prominente di partido ta pone cu awe, un nubia scur ta tapa tur e gran logronan di AVP. E echonan ey a causa cu awe credibilidad di e partido ta na suela. Tur dia ta confronta candidatonan di AVP cu e acusacion cu e partido ta corupto. Ta tempo pa AVP tuma responsabilidad pa su imagen door di bolbe na e norma y balornan di good governance. E partido mester renoba su compromiso cu e vision di Mito Croes pa hisa calidad di gobernacion y politica na Aruba.”

Igualmente e ta sigura cu “e realidad ta cu sin compromiso cu integridad, AVP no merece e confiansa di pueblo pa goberna. Si e partido no demostra seriedad pa cu integridad, tur grito cu AVP mester pa salba Aruba no ta mas cu un pretexto pa no mira su mes den spiel. Sin compromiso cu berdad tur yamada pa subi caya no ta mas cu un expresion di deseo pa poder politico, mientras cu hustamente e tipo di poder aki ta corumpi.”

E discusion aki a bin dilanti debi na e conflicto entre Santos do Nascimento cu su colega di partido Mike de Meza tocante e caso di Eddie Briesen, unda el a sigura cu “ta como miembro prominente di AVP el a sali defende e manera dudoso cu Eddie Briesen a negocia cu Lee Tofanelli and Associates Inc. Representando AVP, Mike de Meza a gaña publicamente cu e como minister a haya un ‘cassatieadvies’ negativo, mientras cu documento ta demostra cu Mike de Meza a haya e conseho pa bay Corte Supremo—pues cu e cassatieadvies tabata positivo. Tambe Mike de Meza a bisa cu e no a exonera Eddie Briesen, pero atrobe documentonan (un carta di De Meza dirigi na abogado Lejuez y un vaststellingsovereenkomst entre Pais Aruba y Eddie Briesen) ta mustra cu e ta gaña; ta Mike de Meza mes a percura pa hala e caso di Eddie Briesen aden sin ningun posibilidad pa rebiba e caso. E chens ta grandi cu De Meza ta responsabel pa e dañonan cu e caso aki a causa. Pero en bes cu partido hala atencion di De Meza, te dia di awe partido ta mantene man riba su cabes door di keda keto, bisando cu tin trankilidad sin solucion. E silencio di partido tin un mensahe fuerte: nos no ta critica miembronan prominente y nos no ta critica partido. Esey ta demostra falta di compromiso cu e berdad. E silencio ta expresa un cultura di cobardia y ta revela un disponibilidad pa gaña pueblo.”

Den comunicado tambe a indica cu “e mesun silencio aki nos tur por a mira den e caso di Paul Croes. Partido mester a splica Paul Croes cu for di momento cu Ministerio Publico a anuncia cu e ta sospechoso den caso Ibis, prudencia ta exigi pa e entrega su retiro y aleha su mes for di politica te ora cu hues trece claridad den su caso.

Esey tabata necesario pa defende e imagen di institutonan politico di Aruba. Sinembargo, e interes personal di Paul Croes a prevalece. Partido a hasta permiti Paul Croes pa core campaña pa eleccion 2017. Ta despues Paul Croes mes a opta pa bandona e campaña, mientras el a “endorse” dos otro miembro prominente di AVP: Mike de Meza y Richard Visser. Pa henter Aruba ta obvio cu AVP no kier tuma su responsabilidad, mientras cu e solucion no ta dificil. Partido mester contesta e preguntanan critico: kico a pasa exactamente den e caso di Paul? Con e corupcion aki por a tuma luga? Kico AVP ta bay haci pa evita cu e violacionnan di integridad lo ripiti?”

Pa loke ta trata e caso di Benny Sevinger, “e historia aki ta ripiti su mes: na ningun momento partido kier a splica e miembro prominente aki, cu for di momento cu Ministerio Publico a anuncia cu e ta sospechoso den caso Avestruz, prudencia ta exigi pa Benny entrega su retiro y aleha su mes for di politica te ora cu hues trece claridad den su caso. Esey no tin nada di haber cu su culpabilidad, sino cu nos compromiso pa proteccion di integridad di nos institutonan.

Es mas, e echo cu Benny no a aleha su mes, ta demostra un falta di consideracion cu interes di e reputacion di AVP mes como e partido cu mas aña di existencia. Pio ta cu partido mes a dicidi pa defende Benny, pa ataca Ministerio Publico y mustra dede riba Evelyn Wever- Croes. Atrobe e mensahe ta cu interes personal di miembronan prominente ta prevalece.”