Ayera pa 9or di mainta e parada di victoria di partido AVP a sali for di cas di partido na playa. Un parada cu a conta cu asistencia masal di e sostenedonan di e partido y cu a termina pa 6or di atardi na Carnival Village na San Nicolas.
E parada di victoria di AVP a pasa den tur districto di Aruba. A sali for di Oranjestad, pasa den Ponton, direccion pa Noord y di eynan a pasa Tank Leendert y Santa Cruz, a sigui pa Pos Chikito, despues Savaneta y por ultimo a yega San Nicolas pa asina termina den Carnival Village.
Simpatisantenan di partido AVP tabata para na caminda tambe presencia e parada di victoria y saluda tur e candidatonan cu tabata riba caminda hunto cu nan lider.
AVP a resulta e partido mas grandi den eleccion di diabierna ultimo caminda nan a saca un total di 17,876 voto y nuebe asiento den Parlamento di Aruba dunando nan asina e mayoria.
