Un multitud grandi a presenta na e reunion cu caracter di urgencia convoca pa partido AVP, ayera 22 di Augustus den ora nan di anochi. Hopi ciudadanonan preocupa y den expectativa a aglomera na cas di partido playa, asina respondiendo na e yamada cu partido AVP a haci. Por a mira ciudadanonan di varios orientacion politico a presenta na cas di partido pa asina uni nan mes na e lucha cu lo conduci cu Aruba ta wordo libera for di e Gobierno actual. Pa motibo di e multitud cu a acudi, organisadonan di e reunion mester a translada e reunion for di den salanan di cas di partido pa dilanti di cas di partido. Un anochi cu un atmosfera di speransa, union y mas importante determinacion pa lucha pa pueblo y pais.
E anochi a inicia cu varios discurso di Parlamentario y Candidatonan di partido AVP cu a expresa nan sentimentonan cu e multitud di cuidadanonan cu a presente motiva pa un cambio di direccion di nos Pais. Parlamentario Arthur Dower, Mike de Meza, Gerlien Croes, Mervin Wyatt Ras, Ryçond Santos do Nascimento y Benny Sevinger a hiba discursonan carga cu emocion y conviccion cu Partido AVP tin un ruta alternativa y tin un vision socio- economico pa salba nos Pais y a motiva e spiritu di lucha den cada un presente. Candidato nan di partido AVP Muzaninn Wever, Clifford Heiliger y Wendrick Cicilia hiba discursonan emotionante y impactante cu a anima e multitud cu partido AVP ta e speransa.
Lider partido AVP mr. Mike Eman a clausura e anochi cu un mensahe fuerte. E momento ta awor! Nos tin cu lucha pa salba e presente y e futuro di nos Pais. Un momento bunita cu a captura e esencia di e anochi ta e momento cu lider di partido mr. Mike Eman a extende un man di union na tur esnan cu tin amor pa Pais Aruba pa den dialogo y union traha na bienestar di e nos Pais. Como simbolo y ehempel di e union aki lider di partido mr. Mike Eman e invita lider di partido Curpa Eric Ras pa asina consolido e union cu tin mester pa asina hunto por bay hulanda cu un plan economico nobo pa asina nos por saca nos pais for di e abismo cu Gabinete Wever-Croes a ocasiona. Lider di partido mr. Mike Eman e enfatisa cu tur gremio, sindicato, gremio comercial, NGO y tur organisacionnan cu ta stima e pais aki mester uni den un dialogo social pa asina nos determina un rumbo nobo pa nos Pais, y partido AVP ta e unico partido cu por y a realisa esaki.
Dilanti di un multitud grandi aglomera dilanti cas di partido Lider di partido mr. Mike Eman a pidi e mandato pa asina inicia un serie di accion cu lo culmina den e salbacion di nos Pais. Lider di partido mr. Mike Eman a ricibi e mandato pa asina acerca conseho di minister di reino Hulandes cu un carta den cu e ta describi e situacionnan cu partido AVP a encontra den e barionan, e pobresa creciente y e falta di interesa pa alivia e dolor nan di nos cuidadano, mientras cu ta impone mas medida riba cartera di nos cuidadano.
E mensahe cu lider di partido AVP mr. Mike Eman mediante un carta lo manda pa Conseho di Minister di reino hulandes ta cu e comunidad di Aruba no ta bay acepta mas medida mientras cu amigo y famia di Gabinete Wever- Croes ta sigui enrikece nan mes cu fondonan publico.
Lider di partido mr. Mike Eman a invita e multitud pa marcha hunto pa asina nos libra nos Pais y a sigura e multitud cu intimidacion ni persecucion lo frena e deseo pa un Aruba liber di e Gabinete Wever-Croes. Cu un mandato di e multitud grandi cu tabata presente lider di partido AVP mr. Mike Eman lo lidera e marcha di cambio den nos Pais. E marcha pa cambio lo inicia mañan Diaranson pa 3:30 di merdia na momento cu lider di partido AVP mr. Mike Eman lo hasi entrega di e carta na VNO cu ta carga e preocupacion y sentimento di un pueblo cu ta sufriendo na man di Gabinete Wever-Croes. E momento pa un cambio ta awor!
