Partido AVP a entrega un ruta alternativa: “Pa provee mas stabilidad y oportunidad pa progreso di nos hendenan”

Ayera mainta lider di partido AVP Mike Eman, conhuntamente cu parlamentarionan di e fraccion, a realisa un conferencia di prensa pa asina informa comunidad cu dialuna ultimo nan a entrega un nota di nan vision di e ruta alternativa pa por cana den e posicion di reino pero tambe riba e presion social y economico di e pais.

Eman a expresa cu e nota aki ta forma parti di un nota completo di Parlamento di Aruba cu lo bay Tweede Kamer, Eerste Kamer y Gobierno Hulandes na unda cu fraccion di AVP ta delinea e caminda pa cana pa asina por haya un alternativa pa lo cual tin riba mesa na e momentonan aki.

“Nos ta un partido cu a inverti hopi aña den reino, nos ta kere den reino, nos a mira a balor agrega di reino y nos ta kere ora cu reino por haya un otro riba un caminda cu ta bay provee mas stabilidad, oportunidad pa progreso di nos hendenan, cu ta bay sirbi tanto pa reino como pa Aruba”, el a indica.

Den e nota substancial aki tin e pensamentonan di e ruta alternativa cu partido AVP ta kere cu tin cu pais tin cu cana pa por sali for di e situacion dificil aki, cu no ta Aruba, Corsou, Sint Marteen of Hulanda so cu ta den buskeda di contestanan grandi, henter mundo a wordo sacudi pa un pandemia cu practicamente a stanca economia di paisnan pa dos aña, sistema di salubridad bao un presion hopi grandi y impacto pa turismo tabata sumamente devastador, manera Eman ta sigura.

Ademas, el a splica cu loke nan a pone den e nota aki ta e forma con pa dialoga pa por yega na solucionnan cu ta bay wordo carga door di tur e paisnan, di esunnan cu ta bay wordo afecta positivamente of negativamente door di decisionnan cu ta bay wordo tuma, mester tin un proceso di dialogo y consulta, di scucha y di pensa pa hunto stipula e caminda nos dilanti.

“E concepto di dialogo nos a sinti cu den e proceso aki, sea no tabatin boluntad, si nos kier pone den un concepto mas positivo, sea cu tabata sinti cu no tabatin tempo pa cana e caminda real di e dialogo cu mester pa yega na un consenso real, un consenso real no ta ora cu un gobernante su so practicamente ta firma pa henter un pais sin cu tabatin un debate pa gremionan, sectornan di parlamento, di pueblo riba lo cual nos ta mara nos mes na dje”, Eman a expresa.

Di su parti, Ryçond Santos do Nascimento a splica cu ora ta mira e situacion aki na Aruba y e hecho cu hopi hende a confronta debenan personal, ora cu ta mira cu na nivel nacional un gran parti di e poblacion a sufri financieramente, cu segun estudionan 20% solamente di forsa laboral ta contento cu nan posicion financiero, den e luz aki Santos do Nascimento a bisa cu ta importante pa wak palabracionnan cu ta tuma luga pa recorte di 60 miyon florin den cuido medico, mas 12.6% di recorte di salarionan, un BTW di 18%, “kico ta e caracteristica di tur e palabracionnan aki te cu awor, lo cual nos a mira ta cu e palabracionnan aki a tuma luga den cambernan scur unda pueblo no ta wak kico ta pasa”, el a menciona.

Den proceso aki a scucha e palabra Landspakket cu ta un palabracion entre Gobierno di Aruba cu Gobierno di Reino pero segun Santos do Nascimiento, den full e proceso aki ta na un nivel asina halto cu tur e personanan cu ta involucra den medidanan no a wordo consulta.

Pa nan di fraccion di AVP ta kere den un ruta alternativo pa motibo cu nan ta kere den democracia y ta kere den dialogo.

Asina mes, el a bisa cu e balor di un referendum ta unda pueblo ta vocifera su opinion unda nan ta persisti di kere den democracia, “esey ta nifica cu poder publico no ta di gobernantenan, poder publico ta di pueblo e ta”, pa motibo cu nan ta di opinion cu mester crea dialogo den comunidad cu mester ta e base pa tur maneho di gobierno y esey ta e motibo di pakico tin libertad di expresion y tin libertad di prensa “pasobra nos mester e dialogo y nos mester decisionnan di pueblo”, el a señala.

Santos do Nascimento a papia di un proceso di rijkswet cu a ser inicia door di Gobierno di Reino y tabatin palabracionnan cu Gobierno di Aruba unda cu den e proceso aki nan a wak un statuut den articulo 16 cu ta duna e parlamento e chens pa vocifera su opinion y cu e opinion aki por ta distinto di opinion di gobierno.

El a bisa cu esaki ta importante pa motibo cu ora ta papia di un consensusrijkswet ta papiando di un rijkswet cu su contenido no ta asuntonan di reino, na unda cu reino mes por dicidi riba nan, cu no mester di un consensus, di e boluntad di un pueblo pa bin cu un ley asina.

“Aunke statuut tin aspectonan cu nos ta bisa cu ta un problema, pasobra den e caso aki no lo ta bay tin un referendum por ehemplo, of Parlamento di Aruba por entrega un nota, pero no por tuma un decision pa para un rijkswet, esey ta problemanan pasobra democraticamente bo no tin un voz pa dicidi pero at least un statuut ta garantisa e dialogo”, Santos do Nascimento a expresa.

Pa e motibo ey nan a pone un ruta alternativo cu e deseo cu cada ciudadano “para y pensa, si bo ta kere den democracia, si bo ta kere cu bo voz mester bale en democracia, e ora nos mester cana un otro caminda” el a finalisa.