Un idea cu a cuminsa como un joke a bira e realidad di un grupo di shete hoben cu na e momentonan aki tin un vision, encurasha otro hobennan pa lanta nan bos y duna nan opinion.

Durante un entrevista exclusivo cu Bon Dia Aruba a tene cu Francheska Jacobs miembro di e partido aki, el a splica con Partido Arubano Uni a cuminsa y kico ta nan proposito mirando cu aña 2021 ta cerca y na Aruba lo tin eleccionnan.

“Nos tur aki nan ariba e isla Aruba ta forma un team hunto pa Aruba por tin un miho mañan. Y asina tambe nos como hobennan di Aruba por sigui crece cu mas reconocimento, y siguramente sin miedo pa expresa nan mes”, nan a duna di conoce riba na Facebook page.

Manera comunidad por a compronde y tambe a keda un tiki sorpresa cu e noticia di un partido nobo, Jacobs a splica cu tabata trata di un wega na prome instante y cu despues nan como grupo a dicidi di lanta un partido riba su mes, Partido Arubiano Uni.

Nan mision como grupo ta pa riba e dia di mañan “lo ta great pa mira ideanan di nos como hoben tambe por wordo treci dilanti, den un gran forma y cu logronan positivo pa nos comunidad”. Segun nan por ta kisas algo cu nunca ningun persona por a trece dilanti.

Francheska tin 25 aña y actualmente e ta traha como security oficcer na aeropuerto pero e partido ta conforma di 7 hoben cu tambe ta traha na e mesun luga, el a sigura cu na e momentonan aki nan no ta pensa cu nan ta prepara pa uni na otro partidonan pa eleccion di otro aña manera hopi hende tabata kere riba rednan social.

“Aworaki nos no ta cla suficiente, di aki pa 4 aña why not? Pero awor nos tin hopi pa siña y hopi pa sa con e cosnan ta draai afo”, Jacobs a expresa.

Tocante e propositonan cu nan como grupo tin, Jacobs a señala cu e duel mas tanto ta pa hobennan bay vota den proximo eleccionnan y pa ken nan ta considera bon candidato, den esaki, el a sigura cu hobennan of adultonan jong por acerca nan libremente y asina por wordo yuda, conscientisa pa por ehemplo, kico mester wak den cada candidato y asina e persona aki por vota. “Nos ta conscientisa hoben pa no keda sin vota sin importa e partido politico cu nan lo scoge, pa motibo cu un voto ta conta y ta importante”, el a declara.

Desde cu riba Facebook e noticia a keda conoci, Jacobs a bisa cu nan a haya hopi reaccion positivo cu ta bisa cu Aruba tabatin mester di esaki, pa motibo cu den añanan atras hobennan no tabata worry pa vota, y esey ta lo cual Partido Arubano Uni no kier, “ si a mi ta topa un hoben mi conseho pe ta cu nos tur tin social media vooral Facebook, wak kico ta going on, e partido cu tin plannan mas similar na bo pensamento dicon a bo no por duna nan un chens e ora?” Jacobs a expresa.

Di loke ta trata otro partido cu miembronan hoben cu tambe a causa reaccionnan diferente riba rednan social, Jacobs a comenta cu nan grupo ta pensa cu nan idea di lanta un partido di hoben ta bon “a mi ta full pro cu esey” pero lo cual nan mester pensa segun Jacobs, ta di ki forma nan ta trece dilanti pa un persona mas grandi cu nan no tuma nan como wega.

Di experiencia cu algun otro partidonan tin na e momentonan aki Jacobs a menciona cu por wak con e partidonan aki a deal cu cierto situacionnan, algun di nan si a surti bon, plannan cu si a bay bon y otronan cu no, di tur e ideanan aki e hobennan por a siña algo.

“A mi ta bisa cu por tin tanta aña di experiencia, pero si un hoben tin tanto tempo ta studia y wak kico nan ta haci y di e manera cu nan ta haci’e, di e forma ey cada un por siña experiencia di grandinan cu tin hopi aña den politica caba, y den ora ey pakico no confia den un hoben cu ta studia pa tanto tempo con un partido como POR, of AVP a deal cu algo, nan tin aña di experiencia pero mi ta sigur cu nan tambe tabata hoben y nan a wak con e otronan cu experiencia a deal cu diferente situacionnan”, Jacobs a bisa.

Asina mes, e ta pensa cu loke ta falta den politica na e momentonan aki ta union, tambe tin cierto topiconan sensibel den comunidad Arubano den epoca aki como casonan di pedofilia por ehemplo, cu Jacobs a declara cu nan como grupo tin reunionnan pa papia tocante topiconan asina, el a expresa cu Aruba a enfoca hopi riba infrastructura, cosnan pa atrae turistanan pero awor tin cierto instancianan cu mester di ayudo y e ta puntra su mes, unda esey a keda?

Tin situacionnan hopi delicado pa loke ta trata pedofilia, cu a wordo priminti y bisa cu lo haci cierto cosnan den tanto tempo of fraccion di seconde mes y ainda tin hopi muchanan wardando un ‘push’ di gobierno pa nan por sali afo si tin ningun miedo.

“Pakico duna un castigo di seis aña pa un persona cu a daña henter e bida di un mucha? Of si ta trata di aborto, un mucha muhe ta bay un instancia e ta haya cu esey no mester”, Jacobs a informa.

Pa finalisa, Jacobs a duna como mensahe cu mester tin mas union, “Aruba tin hopi hende cu ta papia negativo di otro, rebaha otro y esey no ta bon, duna hende oportunidad pa por logra, pa por sigui soña y wak nan soño bira realidad, nos como grupo kier pusha hoben pa nan kere un tiki mas den nan mes y spera cu Aruba por support nan”.