Minister di Enseñanza, Michelle Hooyboer-Winklaar ta splica Bon Dia cu en berdad idioma ta hunga un factor grandi pa locual ta e futuro di hopi alumnonan na scol y cu a reconoce esaki anto ta tumando diferente medida pa yuda alumnonan no solamente pa studia miho y compronde nan materia, pero tambe pa ofrece mas oportunidad pa nan futuro.
Manera ta conoci segun Minister Winklaar, tin un Proyecto Piloto actualmente na 4 diferente scol cual ta un proyecto cu un modelo multilingual y esaki tabata pasobra cu a reconoce cu en berdad e parti di idioma ta keda afecta e resultadonan di nos muchanan na scol. Na mesun momento, tin diferente estudionan internacional cu por wak na UNESCO y diferente plataforma cu ta experto den idioma, cu segun Minister Winklaar a constata cu muchanan cu ta haya e oportunidad pa siña den nan propio idioma pa e prome 3 añanan di cualkier pais, scol primario ta haci miho despues cu cambia pa un otro idioma.
”Esey ta e base di e studionan cu a haya cu diferente instancia nan a haci hunto y a base di esey a dicidi algun tempo pasa pa switch over of haci un Proyecto Piloto pa wak con esey por funciona aki na Aruba. E ora ey a bay na 4 diferente scol, 2 kleuter y 2 scol primario. Den e caso aki ta San Hose y Conrado Coronel y ta draai practicamente bo por bisa den e prome 4 aña di scol, ta 4 idioma ta existi, anto cu e idioma di instruccion ta Papiamento, y tin otro idioma nan cu ta cana pareu, e ora ey esey ta por ehempel Ingles,Spaño y Hulandes”, Sra. Winklaar ta splica Bon Dia. Esaki ta den e ultimo aña di e Proyecto piloto anto e intencion ta , mucha nan cu aworaki ta den cuater klas otro aña nan ta bay topa cu cinco klas na Hulandes. ”Pues esey ta bay bira un aña esencial pa midi e ora ey ki efecto esey tin”, Minister Winklaar ta comenta.
Mundo ta globalisando; Enseñanza mester adapta na e mundo di awe
Mirando cu awo e Proyecto Piloto Scol Multilingual ta bay termina, ta bay saca afo kico ta e resultadonan di esey cual ta hopi importante y segun Minister Winklaar via esaki ta bay por dicidi e ora ey si por expande riba dje. ”Banda di esey nos a cuminsa discuti e posibilidad di bin cu otro alternativa nan como idioma di instruccion, specificamente e parti di Ingles.
E ta keda un opcion cu no solamente lo por habri mas porta pa nos muchanan despues, pero tambe na mesun momento e ta biba hopi mas akinan bo por bisa cu otro idiomanan secundario manera Hulandes. Nos a sinta cu diferente directiva di scol pa papia tocante esaki , tambe un grupo di maestro nan , cabesante nan y tur diferente nivel y nan mes a trece esaki pa dilanti. E principio ta , cu mester por tin opcion existente cu un mayor por dicidi si e kier pa su yiu bay tal scol pasobra nan idioma di instruccion ta Papiamento por ehempel, bay na un otro pasobranan ta duna instruccion na Ingles of Hulandes. Nos ta papiando di tin e opcionnan ey cu mayor mes por dicidi pa fit nan yiu cu e idioma cu nan ta papia na cas anto esaki nos ta boga p’e”, Minister Winklaar ta splica Bon Dia.
Diploma HAVO/VWO ta cumpli cu exigencianan na Hulanda
Segun Minister Winklaar a ricibi notificacion caba cu tur cos ta OK for di Hulanda cu diplomanan ta cumpliendo y no tin ningun cuestion riba e parti eynan. Recientemente locual a pasa na Curaçao segun Minister Winklaar, nan no a bay over na haci adaptacionnan y nan a haya nan mes confronta cu problema tocante esaki.
Minister Winklaar ta splica cu nan si a tuma e decision aki na Aruba y bay sinta cu Ministerio di Hulanda cu colega di Minister di Enseñanza na Hulanda anto esaki a wordo palabra caba.” Manera nos por bay bek algun aña pasa unda tabata tin henter un discusion cu lo mester a bay bin cu diferente adaptacion nan pa sigura cu na Hulanda nan reconoce bo diploma, esey a conduci su mes cu nos mester a haci cambionan den parti di examen pues kico ta un voldoende, kico ta e diferente componentenan, e 7de vak tambe y tur cos awor ta cumpliendo” Sra. Winklaar ta bisa.
