Minister di Enseñansa, Ciencia y Desaroyo Sostenibel, Amando ‘Rudy’ Lampe a informa cu siman pasa nan tabata den Parlamento pa papia riba e fondo cu a ricibi di Hulanda pa loke ta trata e problematica di refugiadonan di Venezuela.
El a señala cu door di e situacion politico, social y economico di e pais en cuestion, ademas di Covid-19, hopi Venezolano a yega Aruba, pa locual nan a pidi un cooperacion di Hulanda pa asina atende e situacion aki, mirando cu presupuesto ta limita.
Lampe a splica cu nan a ricibi un fondo di e cual un gran parti a bay pa Ministerio di Husticia, pa atende loke ta nifica un fluho grandi di personanan cu nacionalidad Venezolano cu ta bin Aruba pa busca un refugio. Pa enseñansa tambe ta un reto, segun Lampe a indica, pa motibo cu tin hopi mucha cu a bin for di e pais bisiña cu no tin nan documentonan regla, pero cu tin derecho riba educacion.
Den Parlamento, Lampe a afirma cu nan mester contesta algun pregunta relaciona cu e uso di e fondonan aki cu a bin di Hulanda pa educacion. “Tur mucha tin derecho riba educacion, independientemente di loke ta nan status legal na un pais”, el a agrega.
P’esey el a afirma cu nan a usa e fondonan pa cuminsa scol virtual pa muchanan migrante na San Nicolas, cu ta pertenece na e di dos proyecto di e indole aki den henter region di Caribe. E prome di esaki ta estableci na Trinidad y Tobago. “E lista di esey t’ey caba, e demanda ta grandi”, el a expresa.
Aworaki, el a sigura cu nan ta den dialogo cu directivanan di scolnan pa muchanan migrante por tin un seguro medico mas economico, pa asina e muchanan por tin acceso na scol y cu pa hopi biaha esey ta un rekisito cu ta impedi pa nan por bay scol.
