Ayera mainta a keda anuncia cu un parti di edificio di ex-Botica Aruba ubica na caya Steenweg ta bay bira un restaurant pa loke Stichting Monumentenfonds Aruba a conta cu esaki ta e di dos fase di restauracion di e luga aki.

Anne Witsenburg director di e fundacion a trece dilanti cu manera ta conoci e edificio aki a wordo construi na aña 1925 door di Adison Croes y na aña 1935 nan a habri e prome botica yama Botica Aruba door di famia Nouel unda nan tabata biba ariba y e botica tabata abao.

Na cuminsamento di añanan 90 nan a bende e cas unda cu despues a habri El Mercado na aña 1993 caminda nan a expande e edificio un poco mas perdiendo un poco su estado original, manera Witsenburg a sigura.

Despues e local ey a cera na 2015 y Stichting Monumentenfonds a cumpra e edificio for di nan unda nan a presenta un plan pa restaura e luga aki y pa duna e edificio un bida nobo, nan a introduci un grupo di artistanan pa keda eynan for di 2016 te cu 2019 mientras e plannan tabata den proceso.

Despues nan a cuminsa cu e parti di restauracion pafo di edificio “p’esey el a keda bunita asina aki y e tin su colornan original” Witsenburg a bisa.

Ora pandemia di Covid-19 a yega na Aruba, tabata hopi dificil pa nan busca huurdonan pa asina ey por haci uso di e edificio, pa algun tempo e luga a keda bashi caminda e aña aki Stichting Monumentenfonds a firma un huur overeenkomst cu un huurdo nobo unda e edificio ta bay haya su di tres funcion den su bida y lo bira un restaurant.

“Nos ta hopi orguyoso di anuncia cu cuminsamento di aña 2023, den e prome lunanan pasobra nos no tin un fecha precies, ta bay habri e restaurant Koal”, Witsenburg a anuncia.

Di su parti Albert Raven hunto cu Tommie Rensen ken nan ta doñonan di loke ta bay bira e restaurant aki a conta na medionan presente den e conferencia di prensa cu nan ta bay ocupa e parti abao di e edificio caminda nan lo habri un ‘chef table’ disponibel pa 16 persona so pa anochi, “e ta bay ta hopi intimo y special unda a mi lo ta cushinando y Tom lo ta sirbiendo nos guestnan”.

Esaki ta pa motibo cu pa hopi biaha segun Raven a declara, e chef no por conecta cu e invitadonan pa loke esaki ta duna oportunidad na tur hende pa por tin mas contacto cu nan di un manera mas personal, “mi ta kere tur hende ta busca esey”, el a bisa.

E concepto di e restaurant basicamente ta bay ta loke nan ta desea di cushina, esey ta nifica cu cada anochi lo tin diferente cuminda. “E ta mas tanto loke mi por haya local, nos ta bay focus riba productonan local y e tambe ta un tiki internacional” Raven a señala.

Igualmente el a sigura cu e tin hopi experiencia den area aki trahando na Abu Dabhi cu Dubai unda e tin hopi influencia Asiatico y e ta bay purba di mix esey cu e cultura Arubiano.

Raven a crece den cayanan di Aruba tambe y el a conta cu ta great pa wak con cayanan di Playa a cuminsa crece back.

Pa scoge e luga aki, el a comenta cu nan tabata buscando luga y un persona conoci a bis’e pa puntra pa e edificio aki y ora nan a wak edificio nan a ripara cu ta e luga ideal pa nan habri nan restaurant.

Pa februari aproximadamente nan tin planea pa habri pero esey ta depende di materialnan y con e proceso di apertura ta bay, ademas cu e luga mester keda cla.

Witsenburg tambe a trece dilanti cu e huurdonan ta bay usa un piso so, pa loke ta nifica cu nan ta sigui busca clientenan pa e parti di ariba di e edificio, nan tin contacto caba cu algun hende cu ta interesa y nan ta espera cu pronto nan por huur e parti di ariba tambe.

Nan como fundacion ta indica na e huurdonan cu e cambionan cu nan por haci den edificio por haciel’e den e parti paden, si nan kier cambia color di muraya nan por haci’e, nan como fundacion ta take care di full e mantencion di e parti pafo di edificio y nan ta drecha loke tin mester.

Pa loke ta trata tur monumento cu ta proteha door di Land Aruba ta Monumentenbureau esun cu ta duna e reglanan, nan tambe tin reglanan cu e fundacion tin cu sigui y cualkier cos cu nan haci nan ta pidi permiso pa Monumentenbureau manera ta wordo pidi pa construi un cas nobo.

Tin algun cos cu nan mester tene na cuenta cune pa no daña e parti exterior di edificio, den caso aki ta bay bin un borchi cu e nomber di e restaurant pero e lo ta algo chikito, pa hende sa cu tin un negoshi eynan.