Oficina di Turismo di Aruba (ATA) su entrada total pa 2016 tabata di Afl. 93.5 miyon, di cual 62% a wordo inverti den promocion internacional, y un 17.6% den desaroyo di producto turistico. Parti di e fondo di 17.6% ta consisti di diferente gastonan, entre otro pa yuda atende cu e problema di Zika riba nos isla.
CEO di ATA Ronella Tjin Asjoe-Croes a declara na Bon Dia Aruba cu for di 2011 parti di e gastonan di desaroyo di producto turistico tabata presente den ATA, pero tabata cay den e concepto di mercadeo internacional. Pues anteriormente tabatin un gasto so den ATA cu tabata esun di mercadeo of promocion. Entrante 2015, esaki a cambia y nan a reclasifica cierto di e gastonan aki cu ta pas mas cu e parti di e desaroyo di e destino of producto turistico cu ta Aruba.
Den e concepto di desaroyo di turismo a wordo añadi tres pa cuater item nan nobo den ATA. “Eynan e papel nobo di ATA ta bin”, asina directora di ATA a declara. El a splica cu e papel nobo di ATA ta permiti pa inverti pa ehempel den nos playa, inverti den AH&SF (Aruba Hospitality & Security Foundation) cu ATA ta haciendo for di 2011 caba. Igualmente ATA ta inverti pa ehempel den aspecto manera combatimento contra Zika.
El a bisa cu si ATA no tabatin e fondo disponibel pa atende cu e situacion di Zika, e tabata algo cu sinembargo nan lo evalua seriamente. E ta considera cu un di e fenomenonan cu ta un “peliger” for di aña pasa y e aña aki tambe, ta e parti di Zika. “Ora bo ta papia di siguridad na nivel di servicio, hospitalidad, nos playanan, pero tambe tipo di peligernan aki manera salubridad, esaki por touch turismo significantemente.”
No ta solamente ATA, pero tambe Ahata y otro socionan den turismo ta preocupa nan mes y ta puntra den colaboracion unda nan por yuda. Pa atende cu Zika, ATA ta considera cu di su banda e yudansa mester bin cu un programa di conscientisacion local. E aspecto aki nan a evalua aña pasa y inmediatamente ATA a reacciona y a inverti e mesun montante cu nan ta haciendo pa 2017 tambe, cu ta alrededor di 150 mil florin.
