Bon Dia Aruba tin algun tempo ta publica un serie di articulo cu e ayudo di Drs. Melva Croes Yanez, ken ademas di su trabao cu Fundacion Alzheimer Aruba ta un nueropsicologo. E meta di esaki ta pa yuda conscientisa comunidad tocante e experiencianan cu nos grandinan ta pasa aden y con pa nos yuda nan di e miho manera, sigurando cu nan por tin un calidad di bida conforme na loke nos tur ta merece.
Pa por conscientisa y educa nos mes di e miho manera, ta importante pa compronde cierto puntonan y trece enfoke riba esaki, cual no ta conta solamente pa pashentnan cu Alzheimer, sino tambe pa cualkier topico relaciona cu e salud y bienestar di nos grandinan en general.
A cuminsa traha riba e meta aki cu varios articulo publica anteriormente, unda cu a enfoca riba varios punto importante alabes, pa tene na cuenta ora ta papia di kico un diagnostico ta. E puntonan aki tabata importante pa compronde, mirando cu esaki ta forma e base di cualkier proceso medico sea relaciona cu Alzheimer of cualkier otro topico y tambe pa compronde kico cierto terminonan medico ta nifica y con nan ta afecta nos bida.
Den e edicion di awe, nos lo amplia e topico un poco mas, y trata algun punto cu ta beneficia henter e comunidad y en especial, ta trece dilanti cierto dificultad cu nos grandinan ta experiencia, cual merece mas atencion di henter e comunidad.
Ademas di e conscientisacion den e ambito medico, tin algun lucha cu te ainda mester cuminsa pa nos por brinda un bida di dignidad y siguridad na nos grandinan, specialmente despues di algun diagnosis medico.
Educacion pa profesionalnan: Cambio di mentalidad y cultura profesional
Mester amplia y mantene bista riba e profesionalnan y e educacion cu nan ta ricibi. Mirando cu medicina ta pasa door di cambio constantemente, y semper tin algo nobo di siña of ahusta, e ta importante pa mantene un educacion consistente na nos profesionalnan, actualisando frecuentemente nan conocemento, ademas di sigura cu nan tin esun corecto.
Por ehempel, ora di usa terminonan medico, pa evita cu nan usa terminonan cu no ta den uso mas of cu a ser ahusta, ta importante pa mantene nan conocemento actualisa y semper keda amplia esaki.
E ta importante pa sigura cu e cultura profesional semper ser manteni, y pa sigura cu nos profesionalnan ta habri na cambio di mentalidad, tanto en general como specifico.
Educacion riba cultura, normanan y balornan di e cliente/pashent
Tambe ta di gran importancia pa tin un grado di conocemento riba e cultura, normanan y balornan di e cliente of e pashent cu ta den e cuido di e profesional.
Cada persona, cliente y pashent ta completamente diferente. Hopi biaha, cultura di un persona ta por afecta tur aspecto y proceso den nan bida, cual tambe ta afecta e experiencia cu cualkier profesional cu ta brindando un servicio. Di mesun manera, mester tene na cuenta cu nos grandinan tambe ta a lanta y biba den un cierto cultura, cu un set di normanan y balornan cu por ta diferente na un otro persona cu sea e mesun edad of e mesun condicion.
E ta importante pa trata cada caso como uno unico, y tin un grado di conocemento den e 3 areanan aki pa asina por brinda un servicio mas completo y adecua.
Den e siguiente edicion di e serie di articulo aki, nos lo sigui trata otro puntonan di importancia den e lucha pa sigura cu nos grandinan tin un calidad di bida cu nan merece.
