Recientemente Bon Dia Aruba a publica un articulo cu e ayudo di Drs. Melva Croes Yanez, ken ademas di su trabao cu Fundacion Alzheimer Aruba ta un nueropsicologo. Bon Dia Aruba kier yuda conscientisa comunidad tocante e experiencianan cu nos grandinan ta pasa aden y con pa nos yuda nan di e miho manera, sigurando cu nan por tin un calidad di bida conforme na loke nos tur ta merece.

Pa por conscientisa y educa nos mes di e miho manera, ta importante pa compronde cierto puntonan y trece enfoke riba esaki, cual no ta conta solamente pa pashentnan cu Alzheimer, sino tambe pa cualkier topico relaciona cu nan salud.

A cuminsa traha riba e meta aki cu un prome articulo publica anteriormente, unda cu a enfoca riba varios punto importante pa tene na cuenta ora ta papia di kico un diagnostico ta, kico un diagnosis ta. E puntonan aki tabata importante pa compronde, mirando cu esaki ta forma e base di cualkier proceso medico sea relaciona cu Alzheimer of cualkier otro topico.

Nos lo profundisa un poco mas riba loke ta trata Alzheimer, mirando cu esaki ta un topico cu no ta ricibi suficiente atencion. E ta importante pa nos ta conscientisa tocante esaki y tin e informacion y conocemento adecua, corecto y suficiente pa nos por brinda un ayudo miho y amplio na e parti di nos comunidad cu tin e trastorno aki.

Alzheimer ta un tipo di trastorno, cu ta ireversibel, progresivo y ta afecta un gran cantidad di persona, cu aunke mayoria ta di edad avansa, por tin tambe un edad bastante hoben. E ta e tipo di trastorno of anteriormente conoci como demencia, cu ta cuminsa cu perdida di memoria leve, te na e perdida di e habilidad di sigui un combersacion y responde na e ambiente.

E ta involucra partinan di e cerebro cu ta controla pensamento, memoria y lenguahe. E malesa aki por afecta un persona su habilidad di ehecuta actividadnan diario di un manera sumamente serio.

Diagnosis Demencia y Alzheimer

Den practica sa pasa cu un profesional ta duna un pashent e diagnosis Demencia y Alzheimer, den un solo rosea, y no ta of no por splica esaki pa e cliente/pashent por comprende. Esaki por confundi e cliente y su sernan keri mas di loke e por splica nan. Un cultura bao nos grandinan na Aruba ta cu tin hopi respet pa profesionalnan y lo tuma tur loke a ser bisa como berdad y sin cuestiona of puntra pa mas splicacion, loke ta ser yama un ‘cultura di miedo’.

Tambe sa pasa cu e pashent NO ta compronde e profesional mes, sea pa causa di idioma, diferencia den cultura, norma y/of balornan. Sigur no ora ta usa termino medico of sofistica.

Esaki tambe por tin como consecuencia cu e cliente/pashent lo bay, entre otro, busca otro hende cu, sigun e, si ta comprondele y kende e lo pone su confiansa den dje. Esaki No tur ora por sali di bon, hasta por resulta fatal! Un ehempel di esaki por ta e uso di remedi di tera hunto cu medicamento receta, etc.

Tambe sa pasa regularmente cu e cliente/pashent ta bay busca un segundo opinion, local of den exterior.

Pakico ta necesario di conoce e termino y diferencia entre e termino “Trastornonan Neurocognitivo” aki?

E conocemento aki lo por capacita esunnan cu ta biba cu un ser keri cu malesanan manera di Alzheimer of cualkier otro trastornonan neurocognitivo-mayor, sea degenerativo of progresivo, cu e informacion y comprendemento necesario pa brinda un cuido y sosten adecua na su ser keri of cualkier persona cu tin un trastorno bao su cuido.

E principal diferencia entre trastornonan neurocognitivo mayor y leve ta:

– E intensidad y gravedad di e sintomanan

– Cuanto y con nan ta interferi cu e independencia di e persona

Ora ta biba cu un trastorno Neurocognitivo-Mayor (esnan progresivo y di tipo Alzheimer) lo yega un momento cu lo bo mester ayudo den cuido, den día, especialmente cu tareanan difícil den cas: manera paga recibo, tuma of administra remedi/medicamento, of ora e persona tin dificultad pa corda asuntonan importante, corda nomber of reconoce cara, etc.

Un Transtorno Neurocognitivo Leve, cual ta e contrario di un mayor, NO ta un malesa (degenerativo)! E ta di suma importancia si, pa identifica esaki mas tempran posibel pa por trata esaki cu mas eficacia y pa preveni of tarda un posibel progresion di un condicion mayor.

E sintomanan por presenta su mes na cualkier edad, pero ta importante pa tene na cuenta cu un Trastorno Neurocognitivo Leve no ta impedi bo di biba un bida independiente. E por si causa cu bo mester dedica mas tempo na tareanan diario compara cu bo bida anterior.

Diagnostico: Trastornonan Neurocognitivo

Pa por diagnostica un trastorno NC-Leve mester existi cambionan cu tin impacto riba funcionamento cognitivo di e cliente/ pashent.

E sintomanan aki ta esunan cu primeramente ta wordo observa/ripara pa e persona mes, pa un familiar sercano, of un hende cu conoce e persona di serca.

 

Pa por brinda un cuido adecua na e persona cu tin e malesa di Alzheimer, e ta importante pa prome compronde cu tur claridad kico e malesa di Alzheimer ta. Ora di tende un diagnosis, nos mester corda cu un profesional tambe por haci fout. E ta keda na nos man pa conscientisa nos mes y sigura cu ora nos tende cierto termino, nos tin e conocemento pa por reconoce un fout si esaki bini dilanti.

Diferencia entre Transtorno NeurocognitivoMayor y Malesa di Alzheimer

Malesa di Alzheimer ta un malesa neuro-degenerativo, y ta un di e condicionan cu ta resorta bou Transtorno Neurocognitivo Mayor.

Un diagnosis di entreotro Malesa di Alzheimer of otro trastornonan neurocognitivo ta papia di condicionan cerebral progresivo y degenerativo y ta ensera cambionan profundo di funcionan cerebral di un ser humano afecta. E condicionan aki tambe ta forma un reto pa esnan rondo di e cliente / pashent den cuido.

Den e siguiente parti di e serie di publicacionnan aki, nos lo trata den detaye e diferente luchanan cu te ainda mester cuminsa, pa nos sigura un bida cu dignidad y siguridad despues di ricibi un diagnosis.