For di algun tempo redaccion di Bon Dia Aruba ta siguiente e asunto di produccion di energia renovable na Aruba. Desde inicio a ripara cu ta aparece cifra asina abao di produccion di energia solar, cu ta imposible cu lo tabatin un proceso normal andando na e dos facilidadnan, en vista di e hecho cu e parti mayoritario di e capacidad instala (alrededor di 9 MW) ta na e dos facilidadnan aki.
Riba e grafico presenta aki, procedente di december 2022, por observa cu WEB mes ta indica cu e cifra ‘Year To Date’ (YTD) ta duna cu e produccion promedio di henter 2022 no tabata mas di 0,7% di produccion total. Gran parti di e produccion, en total 110 MW, naturalmente ta bin di uso di heavy Fuel Oil (HFO), 87,2%, mientras e parque di molina na Vader Piet ta percura pa gran parti di e tipo di fuente aki: 12%.
Na 2022 un reportero di BDA tabatin un conversacion cu vocero di WEB Aruba NV tocante nos impresion cu e parque solar na San Nicolas no tabata operando y cu nos redaccion tabata desea mas informacion tocante esaki. Sin embargo e mensahe tabata cu e compania lo no tabata dispuesto di duna informacion encuanto e tema aki. For di e datonan suministra na december por conclui ademas cu e parque solar na aeropuerto tampoco ta opera, si no lo por a mira un produccion di por lo menos un o dos MW.
Maneho di energia renovable
E maneho demostra awor den e caso di ambos proyecto ta duna di pensa cu e entidadnan envolvi no ta capaz, o no ta dispuesto pa percura pa operacion debido, tumando na cuenta cu ta bastante capital, priva y publico, tin hinca den e dos proyectonan aki. Tambe ta importante señala cu e hecho cu e proyectonan a surgi bao di otro gobierno, pasobra bao di e principio di continuidad di gobernacion cualkier gobierno tin e obligacion di continua cu e proyectonan aki.
Ademas, tur esaki ta duna di pensa ta con ta bay entama proyecto nobo – riba tereno di refineria – si aparentemente no tin e capacidad di maneha y mantene e proyectonan existente.
