Dos biaha pa aña e parlamentonan di e cuatro paisnan di Reino ta topa pa papia tocante interes comun. Banda di diferente topico, loke mas ta hala atencion ta e discusion riba e areglo di conflicto riba cual a yega na un cierto consenso entre e delegacionnan, pero na Den Haag e gobierno ehecutivo no tin pura pa duna continuacion na esaki. Esey por tin varios splicacion. Por ta cu e delegacion Hulandes, ora nan a bolbe den seno di nan partido, a haya sa cu nan coleganan no ta mira e cos asina, y por ta cu esnan den gobierno tambe ta pensa cu “die soep wordt niet zo heet gegeten.” No ta pornada cu ministro encarga cu asunto di Reino, a bin cu un proposicion intermedio, unda a propone pa encarga Raad van State cu atencion di e casonan por lo pronto, te cu bin cu un areglo definitivo despues. Naturalmente esey no a carga aprobacion di e gobiernonan di e islanan, ya cu nan tin otro interes pa defende.
E punto cardinal den e diferencia di opinion ta keda cu fundamentalmente Hulanda y e islanan tin posicion y interes diferente den Reino. Awendia, mescos cu den añanan 50, ta facil pa pronuncia cu nos tur ta igual den Reino, mientras cu nos tur sa cu no ta asina. Y pa sigui troce curpa den tur sorto di maniobra pa mantene e mito ey, finalmente no ta yuda nos pa reconoce e realidad cu nos ta biba aden.
Kico ta realmente loke nos a firma na 1954, como islanan di un banda y Hulanda di otro banda? Nos a acorda creacion di un constelacion mas grandi cu e componente individual, unda gobierno di Reino ta de hecho gobierno di Hulanda, mas e ministronan plenipotenciario. Den cualkier situacion, e gabinete Hulandes tin mayoria y tin bos y voto definitivo den gobierno di Reino. Y pakico esey ta asina? Pasobra e tempo aya caba nos a reconoce cu tin un forma di gobernacion riba e nivel di gobernacion local, cu tin un ‘waarborgfunctie’: esaki no ta e derecho so, sino tambe e deber di interveni den e gobernacion di nivel inferior, si tin motibo pa pensa cu normanan di bon gobernacion ta na peligro.
E aspecto aki ta loke nos ta mira un biaha mas den e famoso conseho reciente di Raad van State, unda cu ta referi na e deber di intervencion aki. Textualmente Raad van State ta uza e expresion Hulandes “niet wachten tot het kalf verdronken is om de put te dempen” pa ilustra cu e responsabilidad di Reino no ta algo unda por sinta warda te ora e ‘baca hoga’. Ta mas cu logico cu e politico local, den su afan pa actua manera cu e ta desea, sin autoridad pa bise cu no por, semper a purba sali for di bao di e supervision aki, cu no ta pa proteha e politico, sino pa proteha e ciudadano Hulandes (local) contra mal gobernacion.
Den e ultimo añanan henter e debate riba e areglo di conflicto a bira un arma importante pa e gobiernonan di e islanan, cu ta dedica mas atencion na e areglo aki, en bes di dedica tempo na gobernacion bon, of gobernacion drechi (‘deugdelijk bestuur’). Ta p’esey lo ta bon si e encuentro bi-anual entre e parlamentonan ta haya como punto di agenda permanente: cumplimento cu norma di bon gobernacion. Esey ta habri caminda pa papia abiertamente riba e detayenan di bon gobernacion, manera por ehemplo ‘transparencia’. Con ta para cu introduccion di ley riba financiamento di partido politico, cu mester yuda limita influencia di contribuyente potente den maneho di gobierno? Con ta para cu transparencia den publica cuenta anual di tur compania estatal y otro entidad legal liga na gobernacion? Por cierto cu den e ley di CAFT cu a keda aproba aña pasa, a bin cu cierto exigencia pa loke ta maneho di e compania y entidadnan aki, pero nos no a tende nada mas tocante ehecucion di e exigencianan prescribi den e ley. Y corda cu no ta oposicion a aproba e ley aki….
Nos ta kere cu e encuentro di e parlamentonan lo ta hopi mas fructifero, si e agenda semper ta repasa e puntonan di bon gobernacion, pa check con ta bay cu nan ehecucion. Claro cu esey no ta conta pa e islanan so, pasobra nos tambe por tin comentario riba legislacion cu ta tuma luga na Hulanda, riba cual nos por tin critica. Pero, manera semper, prome bo bay bringa cu bisiña, percura pa bo cas y bo cura ta na ordo. Nos no mester lubida cu e surgimento di e tema di ‘geschillenregeling’ aki tabata a base di casonan clave di mal gobernacion, no solamente na Aruba sino na e otro islanan tambe. Ora cu djis aki tin un diferencia di opinion atrobe cu Hulanda unda e politico local ta busca nos apoyo, laga nos no lubida unda e conflicto a origina: den mal gobernacion local, na dirtimento di nos como ciudadano.
