Parlamento un gayero completo atrobe…Presupuesto mes no ta al caso mas

Esnan cu talbes a spera cu por fin un biaha nos por mira un parlamento actua na un nivel digno, a sali desapunta atrobe. Parce cu nada lo haci cu nos ta haya un parlamento cu ta opera manera un reunion di  hende civilisa, y mas bien ta parce un gayero, unda banda di e buya y gritamento, ta solamente e pustamento di placa falta. Cuidao cu un dia nos no ta yega asina leu cu betmento ta keda introduci riba cual parlamentario of ministro ta agredi cual contrincante y cu ki resultado.

E unico bentaha cu e tratamento di presupuesto tabatin ta cu esnan interesa den e anecdotanan tras di historia di parlamento, por a haya un resumen tremendo, cu tur detaye personal cu por imagina. Un di e momentonan di menos nivel posibel tabata e intervencion di ministro encarga cu Turismo, cu a haya pregunta di oposicion tocante e contenido di e carta cu el a entrega na Gobernador. El a bay dal un buelta te banda di Antartica pa ilustra – kico realmente? – cu e no ta e unico politico cu a yega di haye den e situacion di un diferencia di opinion cu su coleganan di partido? Con tal cu e preguntanan di oposicion tabata al caso y tabata rekeri un contesta drechi. Nan tabata kier sa kico ta e puntonan di desacuerdo cu sigur tabatin relacion cu presupuesto. Ningun hende no a pone palabra den su boca; ta e mes a declara cu e no tabata di acuerdo cu aspectonan di finanza, husticia y enseñanza, entre otro. Na e momento ey (6 di januari 2016) cu el a bay publico, el a firma caba pa un presupuesto, cu despues e ta declara di no ta apoya completamente. Gobierno no a cambia absolutamente nada den e presupuesto manera entrega dia 15 di december 2015, cu tabata carga firma di e ministro concerni. Confronta aparentemente cu e incapacidad di duna un contesta adecua, el a opta pa baha na un nivel subteraneo den su contesta. Loke a keda bon cla en todo caso ta cu no solamente nos tin un problema di nivel cerca e parlamentarionan, pero tambe entre e ministronan.  Parce cu nan ta lubida e ehemplo tremendo di nos Gobernador tempo cu e tabata politico, cu nunca a rebaha su mes na conducta inapropia den parlamento.

Naturalmente tin bon  ehemplo tambe. Mester bisa cu ministro encarga cu Salubridad Publico, aunke confronta cu critica fuerte riba su persona, a sa di mantene un nivel civilisa den su contestacion. En todo caso e ministro a priminti cu awor si parlamento lo haya e ‘feitenonderzoek’ tocante e sala di operacion cu mester a termina basta tempo caba. Por cierto e ministro a keha den su intervencion tocante e instancianan cu a nenga nan cooperacion den e investigacion aki, loke lo a causa cierto tardanza. Esaki ta algo inaceptabel y ta ilustra un biaha mas e necesidad di entama un investigacion  parlamentario (‘parlementaire enquête), pa por obliga tur persona y instancia envolvi pa duna nan cooperacion y contesta tur pregunta den cuadro di e investigacion aki. Lo tabata bon si e ministro a bay den detaye tocante ken o cual instancia a nenga nan cooperacion, pasobra si ta instancia gubernamental o empleado publico ta culpabel, anto naturalmente esaki no por keda sin consecuencia.

Otro tema importante cu a bin dilanti ta e situacion unda ministro(nan) ta nenga di contesta pregunta haci pa parlamentario. Fuera cu esey ta describi den constitucion, e ta tambe un regla di oro cu tur mandatario mester mantene. Pakico den otro pais, manera Hulanda, un ministro lo no ni hinca den su cabes di no contesta parlamento? Pasobra den tanto siglo di refinamento di regla di comportacion a yega na e consenso cu asina ta trata otro. Ora un ministro na Hulanda no ta mantene su mes na e reglanan aki, ta su mes partido ta ranca su horea. Aki nos mester presencia e prome caso ainda di un parlamentario, cu a ‘lift’ hunto cu e ‘top dog’nan cu a bira ministro, cu ta lanta para y ta haci su trabao debidamente. Y ya cu ta apenas trinta aña nos tin di tradicion parlamentario, ta tristo pa constata anto cu nos generacion, ni esun di nos yiu y nietonan lo mira maduracion den e tipo di conducta aki.

Mientras cu den Parlamento e presupuesto mes a casi disparce for di escenario, e señalnan cu na Hulanda e preocupacion pa e tardanza den tratamento ta aumenta. Pero no solamente e tardanza ta yama atencion sino tambe cu ta bay aproba un presupuesto cu no ta carga aprobacion di CAFT, y consecuentemente lo bay haya un desaprobacion atrobe di CAFT. Despues sin duda algun lo sigui paso  cu gobierno di Reino lo bay tuma pa coregi e rumbo cu Aruba ta bay aden. Parce cu henter e gayero di aprobacion di presupuesto no ta nada otro cu un ehercicio pa e parlamentarionan di banda di gobierno convence nan mes cu nan ta haciendo lo corecto. Pero, nan ta faya, nan ta haya.