Pa un periodo masha cortico nos tin un situacion special den nos parlamento, unda presidente di e organo no ta di e partido mas grandi den un coalicion o di un partido cu ta goberna su so. E situacion aki muy probablemente no ta bay dura tanto tempo, pasobra eleccion na december proximo lo por percura pa un otro composicion den parlamento, cual lo conduci na un gobierno nobo, loke lo resulta den eleccion di un presidente segun e custumber referi.

Esey ta haci cu pa un periodo di algun luna tin un parlamento cu por scoge un agenda diferente, dependiendo di e partidonan cu a sostene e eleccion di e actual presidente. Pero, kico lo ta e agenda di un parlamento asina? Ta continua cu tratamento di e proyectonan di ley pendiente? Presupuesto por ehemplo? Pa por haci esey lo mester existi un base minimo di confianza entre gabinete y parlamento. E colaboracion durante tratamento di presupuesto ta intensivo, siendo e ley cu ta exigi mas tempo cada aña di parlamento. No ta parce nos cu e base minimo ey ta existi y por lo tanto presupuesto 2025, a pesar di ta den man di parlamento, no ta haya tratamento. Esaki lo tin poco sentido tambe pasobra en principio eleccion na december por resulta den un gobierno di caracter diferente, aunke esey no necesariamente ta e caso, cu lo desea di revisa e presupuesto entrega recientemente. Esey ta implica cu por spera tratamento di ley di presupuesto den promer parti di 2025. Y esey ta implica tambe cu no lo cumpli cu e normanan di supervision financiero, cu ta stipula cu mester tin un presupuesto aproba pa 15 di december di cada aña. No mester mira esey necesariamente como un drama; mas importante ta si e ley ta cumpli cu e norma y recomendacionnan duna pa e colegio di supervision, pa despues no tin reaccion negativo di parti di gobierno di Reino.

Otro tratamento di proyecto di ley cu ta na parlamento caba en principio lo por tuma lugar, pero den caso di propuesta entrega pa e gabinete demisionario ta depende di e ministro encarga si e ta dispuesto pa participa den e proceso aki, defendiendo su proyecto dilanti di un sala cu posiblemente no ta comparti su vision y unda no tin un base garantiza manera ta e caso ora e gabinete tabata funciona ainda. Kico ta resta anto? Algun proyecto di ley di iniciativa? Na e momento aki segun nos no tin nada pendiente cu lo por ser trata den e situacion actual. Kico si anto, parlamento por haci? Reunion di caracter informativo, manera esun ya comenta tocante e sucesonan na e fundacion pa subsidio deportivo. Invita un mandatario den e circunstancianan extraordinario aki no lo ta asina facil. Un ministro no lo nenga redondamente di aparece, pero lo tin algun motibo, creible of no dependiendo di cada ken nan pensamento, pero reunion publico pa cuestiona maneho di un mandatario lo no tin sentido si esaki lo bira mas bien un show politico electoral.

E pregunta ta naturalmente si por tin un situacion mas faborable pa reuni como parlamento. Na Hulanda nos por a mira un situacion un poco diferente, unda un parlamento (nobo) ta ricibi y trata informacion di un ministro o secretario di estado, cu ambos banda ta considera importante. Esey por cierto a sucede algun tempo pasa, unda e secretario di estado pa asunto di Reino a presenta un informe tocante e situacion di e momento ey di e relacion entre gobierno Hulandes y gobierno di e islanan.

Y si no tin ningun tema parecido pendiente, anto nos tin un bon sugerencia. Na april 2024 Conseho Consultivo (Raad van Advies) a entrega un conseho amplio riba un gama amplio di asunto cu tin relacion cu reforma pa haci gobernacion en general mas eficiente y eficaz, haciendo uso mas razonable di e recursonan financiero y humano disponible. E conseho aki ta toca varios tema cu ta di importancia tambe pa e deliberacionnan cu ta tumando lugar den cuadro di e Landspakket cu Hulanda. Nos no ta pretende di duna aki un resumen di e relato extenso aki (36 pagina), pero si algun ehemplo di e asuntonan trata. RvA entre otro ta trata e cuadro general pa maneho di e emtidadnan liga na gobernacion, manera e empresanan estatal, e fundacionnan y e entidadnan autonomo, e asina yama ‘zelfstandige bestuursorganen’ (zbo) manera AZV, SVB, Aruba Fair Trade Authority (AFTA) y Banco Central.

Tambe RvA ta toca e tema di e tradicion cu e crece unda den cada formacion nobo ta sigui un ‘reshuffle’ di ministerionan, unda no semper e composicion nobo ta garantiza e mihor forma pa coordina trabao gubernamental. Tin vez e composicion nobo ta percura pa perhudica colaboracion y comunicacion na lugar di scoge pa ministerio cu un paquete logico di cartera. Sigur awor den tempo di eleccion lo ta bon pa politico nobo y esnan experimenta tuma nota di loke nan propio asesor constitucional ta trece dilanti na ‘food for thought’. Invita nan pa expone nan conseho y mustra algo di e union cu siquiera di vez en cuando por mustra pueblo.