Coalicion ayera a aproba tres mocion cu ta duna instruccion specifico na Gobierno di Aruba pa cumpli cu recomendacionnan di Contraloria General. Esaki basa riba investigacion haci riba e plan di maneho di Gobierno di AVP, describi den ‘Bo Aruba.’

E reunion tabata un continuacion di debate publico riba e rapport cu a keda produci na 2018, cu a cuminza na januari e aña aki.

Sinembargo, ta te awor a termina di dos ronda di e reunion unda a presenta mocionnan specifico.

E rapport di ARA tabata hopi critico contra diferente proyecto ehecuta pa Gobierno di AVP, y specificamente a haci cuestionamento severo riba e proyectonan MFA, cu segun ARA no a cumpli cu rekisitonan di Ley di Comptabilidad.

Mirando cu fraccion di AVP no tabata den e sala, practicamente no tabata mucho discusion y algun di e preguntanan cu tabatin a bay pa Minister di Infrastructura Marisol Lopez Tromp kende a splica e proceso di e proyectonan PPP y con nan a bin na vigor. Es mas, Lopez Tromp a bisa cu e idea di PPP (public partner partnership) a bin na Mei, Juni 2009, unda a bira cla cu presupuesto di Pais Aruba mes no por carga proyectonan di magnitud grandi pero necesario pa e pais. E Director di DOW e tempo ey a bay hasta un curso na Washington DC pa haya sa mas detaye con e sistema aki mester traha.

Pero e ta obvio cu e proyectonan, unabez ehecuta, a laga hopi pregunta atras, incluso cerca Contraloria General cu ta motibo tambe pakico e fraccionnan MEP, POR y RED a acepta tres mocion, dirigi na Gobierno pa haci lo maximo pa evita cu Aruba ta haya su mes den mas situacion asina,

E prome mocion ademas ta urgi Gobierno di Aruba pa mas pronto posibel entama e proceso di investigacion pa identifica esnan responsabel pa sumanan cuantioso cu no por a keda responsabilisa segun e evaluacion di Contraloria General di e rapport Bo Aruba.

Tambe ta pidi Gobierno pa percura pa recomendacionnan haci door di Contraloria General relaciona cu duna informacion na tempo y debido na Parlamento. Esaki pa e organo por haci su trabou di control y supervision.

Tambe e fraccionnan ta urgi pa repasa proyectonan actual di Gobierno y mustra cumplimento na e rekisitonan manera indica pa ARA. Por ehempel, si e proyectonan ta mara na meta, cua ta e indicadonan, y con ta cumpli cu tur rekisito. Ademas pa percura si ta cumpli cu reglanan estableci den ley di comptabilidad manera e obligacion pa apoderacion segun un ley, na momento di cuminza cu construccion, renobacion di proyectonan riba tereno priva, prome cu cuminza cu ehecucion di plannan.

Mester bisa cu e reunion tabatin un caracter diferente. Na principio e tabata mustra comosifuera fraccion di AVP no a acudi e reunion mes. Sinembargo despues a resulta cu tabata un decision di Parlamento pa organisa e presencia di Parlamentarionan di tal forma pa evita cu tur ta hunto na e mesun momento. Den e caso aki, fraccion di AVP a pasa e reunion den e ‘fractiekamer’ y Parlamentario Daphne Lejuez a siguie e reunion na un forma digital. E peticion di Griffier ta pa e reunionnan publico sigui di e forma aki pa evita cu por tin contagio di Covid. Esaki despues tabatin dos trahado di Parlamento cu algun siman pasa tabata infecta cu e virus, y recien un di tres a keda infecta pa e coronavirus. Awe ta bay tin un encuentro publico den Sala di Parlamento durante cua Minister di Finanzas Xiomara Maduro lo duna un splicacion na Parlamento riba e ultimo Raportahe di Ehecucion cu a bay pa CAFT.