Parlamento ta trata presupuesto di Gobierno pa aña 2024; Min. Husticia: “Esnan cu vota awe contra presupuesto ta vota contra tur proyecto di balor agrega”

Diamars 12 di december Parlamento di Aruba a cuminsa cu tratamento di presupuesto di Gobierno di Aruba pa aña 2024. Durante e prome reunion publico pa cu esaki, a trata e presupuestonan di Ministerio di Husticia y Asuntonan Social, Ministerio di Enseñansa y Deporte y Ministerio di Economia, Comunicacion y Desaroyo Sostenibel.

Minister di Husticia y Asuntonan Social, Rocco Tjon, a elabora ariba e proyectonan cu ta inclui den e presupuesto di su ministerio pa aña 2024.

El a indica cu na varios ocasion e tabata den Parlamento pa duna un splicacion amplio pa loke ta trata e maneho di husticia y asuntonan social, e parti di prevencion y represivo, el a yega di splica tambe di e diferente investigacionnan cientifico cu ta andando y cu ta ser usa tambe pa por yega despues na data driven policy, y el a splica tambe di tur e diferente comisionnan cu a ser institui den e diferente areanan di necesidad.

Pa loke ta e presupuesto 2024, e mandatario a remarca e diferente proyectonan concreto, 22 cu el a menciona, cu e presupuesto aki tin hinca aden pa loke ta trata Ministerio di Husticia y Asuntonan social.

“Esnan cu vota awe contra di e presupuesto aki ta vota contra tur e diferente proyecto cu ta di balor agrega pa e departamentonan hudicial y tambe pa e departamentonan social,” el indica.

Den su presupuesto, Minister Tjon a splica, ta papia di e Operation Command Center. Cu ta bay ta situa na Savaneta, cu ta bay bira e centro caminda tur imagen di e proyecto nacional di vigilancia di camara di seguridad ta yega.

Den e presupuesto ta papia di e di cuater radar pa fortifica seguridad na frontera, e proyecto di ex warda di polis na Savaneta, e inversion den portofon completamente nobo pa full Cuerpo Policial, cu tin extra seguridad incorpora pa e propio seguridad di e miembronan, pero tambe pa e aspectonan di integridad di e propio organisacion, un ‘wagenpark’ completamente nobo pa Cuerpo Policial, un campaña nacional pa loke ta seguridad den trafico y specificamente e parti di alcohol lo haya su debido atencion.

El a menciona e renobacion di e brandweer post airport, tambe cu pa prome biaha dienst brandweer ta bay haya un ‘ladderwagen’ cual el a indica ta un inversion cuantioso di riba dos miyon florin cu ta bay percura cu brandweer por brinda un miho servicio y eleva seguridad no solamente di e ciudadanonan pero tambe di e propio empleadonan di brandweer.

Pa loke ta trata e parti di salud mental, crisis dienst pa salud mental, Minister Tjon a indica cu lo introduci ampliacion di e FACT team, specialmente pa mucha y hoben. El a menciona cu otro siman gobierno ta bay lansa e ‘Tourism Security Patrol’ pa Aruba cu ta bay amplia visibilidad den e area turistico. Esaki ta un proyecto cu ta ser realisa den colaboracion cu Ministerio di Turismo y segun el a indica combersacionnan ta bay cuminsa pa amplia e proyecto aki den centro di ciudad tambe.

El a sigui splica cu den e presupuesto ta papia di renobacion a Directie Sociale Zaken, e ISO trayecto pa Directie Sociale Zaken teniendo na cuenta tambe cu e procesonan di trabao y e cultura tambe di e departamento.

E mandatario a señala cu e proyecto di veilige barios ta continua y cu ta un proyecto importante cu ta enfoca ariba tur e diferente areanan den comunidad. El a agrega cu un proyecto piloto ta bay ser introduci den cuadro di e veilige barios y esaki ta bay ta un proyecto cu ta ofrece bijles gratis den e centronan di bario rond di Aruba pa esnan cu tin mester di esaki, pero cu no por paga e bijlesnan aki.

Minister Tjon a resalta cu den e presupuesto ta papia di un groeifonds pa cual hopi critica a bin di parti di parlamento nan ta wak cu full e cadena hudicial mester ser reenforsa pa loke ta trata e parti di recursonan humano. El a resalta cu e groeifonds aki ta bay percura pa esey.

El a agrega cu ya caba den januari tin un klas di polis cu ta bay cuminsa y na augustus dos klas di polis ta bay cuminsa, locual ta nifica cu mas di 50 agente policial lo ricibi curso, si e presupuesto aki ser aproba.

Pa loke ta e parti di DMH y full e proceso di kinder opvang, el remarca cu esaki lo continua. El a menciona cu, manera ta conoci, diasabra ultimo 49 profesional a ricibi nan diploma pa loke ta curso cu ta bay eleva e calidad di cuido y seguridad di e muchanan na e diferente centronan di cuido.

Minister Tjon a ricibi hopi pregunta for di diferente parlamentario Aruba e tema di violencia relacional y violencia domestico. El a splica cu gobierno ta colaborando cu Unesco y algun siman pasa, durante su bishita na e Youth Forum na Francia el a reuni cu e director di Unesco pa loke ta trata e area Caribense y segun el a indica, Unesco a compromete su mes cu nan ta bay yuda Aruba cu dos programa di conscientisacion. Un di esakinan cu ta hopi importante ta “Changing Mentalities”, cual segun el a señala ta un campaña di conscientisacion specificamente dirigi pa loke ta trata violencia domestico y violencia relacional.

Banda di esey ta bay tin un “Peace Building Program” cu ta bay ta specificamente pa e seguridad na e scolnan. El a agrega cu ya caba Ministerio di Husticia y Enseñansa a reuni cu e diferente directivanan di scol riba e parti aki.

Pa loke ta e proyecto di Family Justice Center, un proyecto cu, si no tin ningun contratiempo, lo keda cla e prome mita di aña 2024. El a menciona tambe e proyecto di e edificio di ex Codemsa. El a splica cu e destaho pa e proyecto aki lo cuminsa den luna di maart y den luna di april e trabaonan lo mester cuminsa. El señala cu e presupuesto ta papia tambe di e proyecto di introduci cuido forensico specificamente pa esnan cu tin mester di esaki, y hobennan tambe na KIA.

Banda di esaki, e mandatario a remarca, den tur e beleidsvoornemen (intencion politico) di cada departamento tin mucho mas cu ta bay ser realisa, pero esaki ta e proyectonan concreto cu su ministerio ta elabora riba dje den e presupuesto di proximo aña.

“Esaki ta djis pa duna un bista pa ora nos yega na momento di votacion, a base di tur pregunta cu a ser haci door di parlamentario si nan kier solucion pa e retonan cu nan mes ta mira, mi ta kere nan mester por aproba un presupuesto cu ta cumpli cu normanan financiero, cu no ta perhudica nos pais, nos situacion financiero y cu ta percura pa diferente retonan por ser surpasa,” el a enfatisa.