Diahuebs mainta, Prome Minister Evelyn Wever-Croes, Minister Dangui Oduber y Minister Xiomara Maduro tabata presente den Parlamento pa trata un ley cu ta atende cu e “settlement” den caso di Aruba Music Festival (AMF). AMF ta un festival cu Aruba tabata conoce te cu aña 2009, cu a atrae hopi turista y a genera un desaroyo economico di como 9 miyon dollar pa e añanan cu e tabata den efecto. E festival aki tabata di Gabinete Nelson Orlando Oduber IV di cual e minister encarga e tempo ey tabata Sr. Eddie Briesen.
Prome Minister a splica cu na aña 2009, ora cu gobierno di AVP a sinta, nan a para e proyecto aki simplemente pasobra e tabata un proyecto di MEP. Akinan ta unda Sr. Lee Tofanelli cu ta e promotor di dicho festival a lanta un caso contra Land Aruba di cual el a gana. Gobierno di AVP, mirando cu nan a perde e caso, a dicidi di no apela sino purba na yega na un settlement di cual na 2017 ora nan a wordo manda cas no a logra termina.
Na momento cu Gabinete Wever-Croes a drenta gobierno, Minister Dangui Oduber a tuma e dossier over y a continua cu esaki pa purba na finalis’e. Finalmente, e gobierno actual a logra yega na un suma di settlement cu awor mester wordo poni den un ley, paso niun gobierno por yega na un settlement sin cu Parlamento aproba esaki den un ley.
Pa Parlamentarionan di MEP y RAIZ cu ta mayoria den Parlamento, e caso aki ta un dilema grandi, na unda mester bay dicidi si nan ta bay di acuerdo pa soluciona un problema ocasiona pa AVP. Na e momento aki tin un settlement riba mesa cu e dicho compania pa un suma hopi mas abou cu si lo a dicidi di sigui bringa e caso den corte, pues pa cu esaki e ultimo palabra ta keda na Parlamento.
“E bentaha cu nos tin ta cu nos ta un gobierno responsabel, y nos Parlamentarionan di coalicion sa esaki. E gobierno di Gabinete Wever-Croes II, sinembargo di ken a ocasiona e problema, ta carga e responsabilidad pa solucion’e. Nos a bin den gobierno pa soluciona problemanan di pais Aruba, pasobra nos prioridad ta e interes general di pueblo,” Prome Minister a expresa.
