Presidente di Parlamento, Marisol Lopez-Tromp a manda un carta pa gobierno pidiendo tur informacion y acuerdo cu a wordo cera recientemente pa loke ta e asunto di reapertura di refineria. Esaki segun Sra. Tromp ta debi na e echo cu te cu awe Parlamento no a ricibi copia di e documento nan aki y tur loke ta relaciona cu loke gobierno a dicidi den nomber di Aruba.
Segun Sra. Tromp a pidi pa mas pronto posibel gobierno entrega e documento nan pasobra sin e documento nan bo no por yama un reunion. No por yama un reunion si tur e Parlamentario nan no a prepara y no a lesa e documento nan pa por haci nan pregunta nan na gobierno sea pa pidi aclaracion of duna cualkier punto di bista cu nan tin. Sra. Tromp ta agrega cu no por ta asina cu un acuerdo asina grandi di un magnitud manera esaki cu ta durante un reunion ta bay wordo presenta na Parlamento y pa e ora ey bay studia esaki. P’esey ta poni tambe den e carta cu ta hopi importante pa haya contenido di e acuerdo aki y tur loke ta documento nan relevante cu por yuda Parlamentario nan pa tin un tratamento publico na nivel y cu tin sentido y ta pa e motibo aki a pidi e documento nan aki adelanta.
”Diferente miembro di Parlamento vocifera pa entre otro fraccion di M.E.P. ta pidi pa haya un reunion publico caminda cu nan lo por haya informacion riba e documento nan aki y tambe pa haya transparencia pasobra te cu awe nan ta bisa cu nan no a haya ningun informacion y nan ta pidi presencia di ministernan de Meza, Eman y tambe Croes pa cu e reunion aki” , Sra. Tromp ta comenta.
Di otro banda, tin un peticion tambe cu presidente di Parlamento a ricibi di parti di parlamentario Sr. Donny Rasmijn kende ta presidente di e comision Wetenschap Innovatie Energie & Duurzame Ontwikkeling aki na Parlamento y su persona tambe ta bisa cu e ta desea di haya un reunion informativo riba e topico di “overname lease & heropening” di refineria na Aruba . ”E ora como presidente di parlamento , mi ta manda un carta pa gobierno referiendo na e peticion nan aki di nos miembro nan di parlamento y naturalmente cu e echo cu prome cu e acuerdo aki a wordo cera, parlamento no a haya informacion of ningun detaye riba esaki pa duna un aprobacion of pa duna un direccion riba esaki , sinembargo aworaki den prensa tin hopi informacion anto nos ta desea claro como parlamento pa haya tur informacion pa asina por prepara tambe pa unabes cu leynan lo bin parlamento cu tin cu wordo trata” Sra. Tromp ta splica.
Pakico ta importante pa gobierno acerca parlamento prome
segun Sra. Tromp, tur acuerdo cu gobierno cera ta den nomber di Aruba y semper ta normal pa e bin parlamento prome, no solamente den caso di refineria pero cualkier otro acuerdo grandi.
”Por ehempel un aña atras tambe riba e asunto di CAFT, lo tabata importante pa a bin parlamento prome cu cera cierto acuerdo nan cual no a sosode e tempo ey tampoco anto parlamento a haya su mes cu un ley pa trata despues cu gobierno a acepta caba. Ta asina cu atrobe tin un acuerdo cera di un magnitud grandi cu ta no solamente conta pa awo, pero e lo por mara Aruba pa algun decada. Kemen hasta ora cierto parlamentario nan y minister nan cu t’ey awe no t’ey mas, mañan lo tin otro politico nan y ta pa Aruba e ta wordo cera y no pa gobierno su minister of nos den parlamento , e ta pa henter Aruba. Ta mas cu importante pa Parlamento haya un bista prome y pa asina por duna su deseo nan of sugerencia nan den esaki”, Sra. Tromp ta splica Bon Dia.
Ta asina cu tabata tin mocion nan segun Sra. Tromp den e reunionnan publico den pasado relaciona cu e topico aki , un mocion ta un deseo di parlamento pero unabes cu bo bay cera acuerdo nan concreto cu ta mara bo pais legalmente, ta na su luga segun Sra. Tromp pa Parlamento haya e informacion nan necesario prome cu cera esaki. ”Aworaki cu esaki a sosode, tin miembro nan di Parlamento cu a tuma nota pues den publicidad di diferente informacion, pero naturalmente kier haya tur documento relata na esaki pronto pa asina esaki wordo prepara y discuti door di nos miembro nan di Parlamento.” Sra. Tromp ta comenta.
Segun Sra. Tromp, un bon pregunta berdad pa haci na e minister nan concerni ta kico ta nan motibo nan pakico no a bin Parlamento prome. ”Con cu bay bin, Parlamento a yega di pidi informacion prome, tabata tin algun ocasion caminda cu tabata tin minister cu a bin splica den comision nan fiho kico ta nan intencion nan y naturalmente unabes cu yega asina leu cu bo ta cla pa bay firma, den tur otro pais esaki ta normal cu e ta na su luga pa bo informa Parlamento prome y pa por bisa si of no si a caso kier agrega algo of kier un cambio na interes di pais Aruba.
