Na momento cu e lector haya e Editorial aki pa lesa, probablemente ya e resultado di e Conseho di Ministro di Reino di diabierna mainta ta conoci. Nos no ta bay specula riba resultado di esaki. Por ta cu Aruba y e otro islanan ta logra algo negocia pa loke ta e entidad di Reino cu mester bay dirigi implementacion di e reformanan cu Hulanda ta haya necesario, pero en todo caso nos ta kere cu e imposicion pa Aruba di e supervision financiero di Reino bao di e ley cu ta vigente caba pa e dos otro islanan, ya lo ta un hecho.

Esaki pasobra ya Aruba tin cinco aña bao di e mesun regimen di supervision di Reino aki, camufla den un ley di Aruba, cu danki na e genio negociador di e anterior ministro presidente, te awe tin hopi hende ta kere cu ta awor no mas nos ta bay haya supervision di Reino, algo totalmente absurdo.

No ta pornada Bon Dia Aruba e siman aki a publica un analisis comparativo entre e dos leynan pa mustra cu practicamente no tin diferencia. Nos a observa tambe cu nos Promer Ministro a comenta publicamente cu en berdad no tin tanto diferencia, y a probecha e oportunidad pa mustra cu “si ta papia di perde autonomia, anto cu esey a sucede 5 aña pasa” tempo cu a bin cu e ley di Aruba, sino Hulanda lo a impone e ley di Reino e tempo ey caba. Di esey nos ta saca e conclusion cu aceptacion di e ley di supervision financiero ya ta un hecho caba, a pesar di e mocion di e partidonan reuni den parlamento, cu ta urgi gobierno pa rechasa esaki.

Un poco otro ta e entidad cu Hulanda ta desea di institui, tambe via un ley di Reino, pa dirigi e proceso di reforma cu cual a condiciona e ayudo financiero na e islanan, cu ta abarca e terenonan clave cu nan ta mira como necesario pa trece tal reforma. Nos ta ripara aki cu e bataya a concentra di inmediato riba e aspecto di ‘autonomia’ cu eventualmente ta entrega na fabor di e podernan cu supuestamente un entidad asina ta haya, mientras te awor practicamente nos no ta tende nada tocante e agenda cu ta bin encera den e documento referi, cu ta e ‘Landspakket Aruba’ cu a proposito a ‘leak’ net na tempo. Encuanto e asunto di entrega di autonomia, lo siguiente. Cu politiconan ta mira esaki como un limitacion di autonomia ta di comprende. Esaki no solamente pasobra pa haya y usa placa Hulandes, nan mester deal cu un entidad institui pa ley di Reino, pero tambe pasobra e escrutinio financiero ta bira hopi mas severo. Esey niun di nan lo gusta, pero pa pueblo e ta haci un diferencia positivo, pasobra nos no por ta nada contento cu e forma actual di gasta placa sin duna debido dunamento di cuenta. E Hulandesnan absolutamente no tin ningun plan di hinca placa den e tres islanan aki sin cu nan sa kico ta bay haci cune. Ta ken kier kita nan razon, despues di tur cos cu a pasa den ultimo decadanan? No ta hopi di nos mes tabata sclama pa mas control riba tur e proyectonan cu tabata bay robez, sin cu tabatin un intervencion oportuno den esaki? Awor porfin a cuminza actua, cu tres caso penal andando contra (ex) mandatario, y esey no ta suficiente prueba cu tin cos pa mehora na e sistema di supervision, pa evita e tipo di cosnan aki den futuro? Esaki no mester mira sin embargo como un ‘brevet van onvermogen’ pa e actual gobierno, sino e cosecha di asunto negativo cu a acumula di pasado, pero ta esun cu ta den e ‘driver’s seat’ awor ta esun cu mester negocia y actua. Esnan di pasado.. pues ta pertenece na pasado.

Pa loke ta e eventual exito di bringa e entidad nobo pasobra e ta kita autonomia, simplemente esaki. Aparentemente 10 aña pasa e islanan a bay di acuerdo cu ta crea entidad di control y supervision cu ta opera bao di capa di un ley di Reino. De repente e modelo aki ta bira obheto di critica y ta bay keha cerca instancianan internacional pasobra ‘Hulanda ta recolonisa nos’? Pakico e tempo ey si, cu mester a scapa pellejo di e dos islanan aya, si e modelo di Cft tabata bon? Ademas, nos a tende awor e argumento cu e Rft ta contra constitucion… Really? E hendenan aki ta lubida cu tin un nivel superior di gobernacion cu yama ‘Reino’? Nos ta desea esnan cu ta bay agita na nivel internacional hopi suerte cu nan guera inutil.

Pero tin un motibo mas pakico politiconan ta kere cu esaki ta limita nan poder: e entidad ta habri oportunidad pa persona, entidad o empresa haya ayudo directamente, sin cu nan mester pasa e ‘filtro politico’ cu tin e lugar cu yama Aruba aki na unda e ta! Claro cu esnan cu ta solamente pensa den con nan ta reparti e beneficionan entre nan famia y amigonan, ta protesta pasobra ta yega un fin na e reparticion malvado aki, cu ta stroba nos di bay dilanti como pueblo. Nos pais mester un rumbo nobo; esun cu kier keda den pasado, ta liber pa haci esey.