Pronto parlamento lo bay den reces. E periodo aki ta cuminsa na juli awor. Tin varios ley den agenda di presidente di Staten, Sr. Juan ‘Ady’ Thijsen pa wordo trata riba cierto prioridad. Un di nan tin di haci cu e cambionan den legislacion pa atende cu e crisis actual.
E cambionan aki lo wordo haci pa medio di ley of ordenansa nacional (landsverordening) cu gobierno mester presenta na Parlamento. Un di nan ta esun cu actualmente sindicatonan ta protesta riba cortamento di nan salario. E ta un di e reunion cu eventualmente lo tuma luga prome cu receso di Staten. Sr. Thijsen a declara na Bon Dia Aruba cu asina Parlamento ta habri bek ora cu reces caba, nan kier hacie di forma normal cu presencia di publico den tribuna.
Igualmente el a laga sa cu un ley cu pronto lo wordo trata ta esun cu ta regarda y podera e consumidor y tambe ta garantisa competencia husto. Igualmente otro ley tin di haci cu esun cu ta reglamenta gamblemento den casino. Otro ley pendiente pa wordo trata ta reglamenta legalmente e posibilidad di cera acuerdo di credito of fiansa via electronico.
Presidente di Parlamento a indica cu otro ley tin di haci cu e pareha di e esun sexo pa bin cu cambionan den codigo civil. Parlamento a yega di tuma decision caba den pasado riba e ley aki. Pero awor tur e puntonan of detayenan mester pasa via un ley awor. E ta un ley cu presidente di parlamento ta consider’e ‘hopi interesante.’
E agenda ta hopi diki. Ta bay bin reunion pa tuma decision riba ley di screening pa minister cu mester keda cla pa nan pas’e. Tambe e ley di financiamento di partido politico. E ley di ‘ombudsman’ of defensor di pueblo. Nan ta leynan cu ta wordo menciona pa basta tempo, pero cu te ainda no por a bira un realidad mirando e embergadura di nan mes. Presidente di Parlamento ta haya e tres leynan ultimo aki crucial pa bin cla cu nan, ya cu nan ta fortifica bo estado di derecho.
