Mayoria di miembronan di parlamento na Hulanda a vota na fabor di un toque de queda for di 9pm te 4:30am. E toque de queda lo cuminsa pa 9pm diasabra, mey ora mas laat di loke prome minister saliente, Mark Rutte, a propone.
E asunto a ser debati ayera den Parlamento, ya cu tabata considera un politica controversial cu no mester wordo ehecuta pa un gabinete encarga dos luna prome cu eleccion general. E votacion a tuma luga poco despues di 6:30pm, mas di ocho ora despues cu e audiencia riba e toque de queda a cuminsa.
Partido di e coalicion saliente, D66 a entrega un mocion varios ora den e debate pa cambia e comienso di e toque de queda. Esey a gana sosten di partido di prome minister saliente, VVD, y e otro partidonan di coalicion, CDA y Christen Unie. Adicionalmente, Labor (PvdA), Partido Socialista (SP) y 50Plus a vota na fabor, representando un total combina di 101 asiento den Tweede Kamer. Actualmente tin 149 persona sirbiendo como parlamentario. Un mayoria simpel tabata rekeri pa aproba e medida. E resto di e miembronan a vota cu lider di ultraderecha, Geert Wilders, den su mocion contra e medida. Esnan cu a vota cu Wilders a inclui GroenLinks, Partij voor de Dieren, SGP, Denk y Forum voor Democratie.
Persona cu no cumpli cu e toque de queda lo ricibi un boet di 95 euro, plus cualkier costo administrativo aplicabel, pero no lo tin un marca den nan record criminal. Ferd Grapperhaus, minister saliente di Husticia, a bisa ayera cu e Marechaussee lo asisti polis cu cumplimento. Un individuo haya usando documentonan falso pa gaña autoridadnan pa kere cu nan tin exencion di e toque de queda lo ricibi un castigo mas pisa.
