Dialuna mainta Prome Minister demisionario, Evelyn Wever-Croes (MEP) hunto cu demas minister di Gabinete Wever-Croes II tabata presente den sala di Parlamento pa trata e Presupuesto Complementario 2024.

Durante su discurso, Prome Minister a indica di ta satisfecho cu pa prome biaha den historia un presupuesto ta wordo entrega, trata y aproba na tempo, manera ley ta prescribi. Na Mei 2024, Gobierno a presenta e prome cambionan di e presupuesto y e “voorjaarsnota” cual a keda trata y aproba pa Parlamento. Mirando cu tin mas cambio, ta importante pa fin di aña bin cu un “najaarsnota” pa asina informa Parlamento di dicho cambionan.

 

Prome Minister a indica cu a pesar di varios cambio, e presupuesto a keda cu su surplus di 2.3%, cu ta mas halto di loke ley ta prescribi, danki na e crecemento economico positivo di pais Aruba. Den un comunicado di prensa, el a bisa cu “tambe ta un orguyo pa wak cu e aña aki ta cera cu un “debt to GDP ratio di 71%, danki na e trabou duro di nos profesionalnan, di e ministernan, y di Parlamento.”

 

Presupuesto Complementario: Kico e ta inclui?

Manera Bon Dia Aruba a publica anteriormente, den e presupuesto tin 10 miyon florin adicional cu por ser aloca na e diferente proyecto di otro ministerio door di e inhaalactie cu a tuma luga na DIP.

Pa loke ta trata costonan di ministerio di Asuntonan General, Innovacion, Organisacion Gubernamental, Infrastructura y Planificacion Teritorial e presupuesto complemetario ta indica cu parti di e gastonan di preparacion pa e eleccionnan adelanta a ser traspasa pa e puntonan relevante. Como cu esaki no ta suficiente, 300 mil florin a drenta riba e articulo otro gastonan di e centro di gasto otro AZIOIRO. E cobertura ta bini di e agotamento di e post di subsidio di duracion di pensioen.

Pa loke ta e transferencianan, e presupuesto ta indica cu e calculacion pa e parti di pensioen-sparingstoelage ta excesivo y lo ser ahusta cu 300 mil florin menos. E diferencia aki ta ser usa pa cubri e gastonan di preparacion di e eleccionnan.

Relaciona cu e yobidanan fuerte cu a sucede algun tempo atras loke a trece consecuencianan pa e infrastructura di careteranan, DOW a usa gastonan di emergencia necesario pa tuma medidanan pa preveni y limita daño cu ta un resultado directo y inmediato di e awasero pisa prome cu e tratamento di e di dos presupuesto complementario pa 2024.

Esaki, consecuentemente a retrasa e calculacion pa e plan di mantencion di caminda di varios aña. Esaki, e presupuesto ta indica, e calculacion pa e plan di mantencion di caretera di varios aña mester ser ahusta cu 2.530.00 florin menos y e suministro di coriente pa DOW ta ser recarga de bes en cuando. Como resultado, e presupuesto di DOW lo ser aumenta cu e mesun suma pa cubri e gastonan di emergencia ya adelanta pa infrastructura di caretera.

E presupuesto tambe ta señala cu a base di cifranan di realisacion preliminar pa 2024, e calculacion di Leaseholds di DIP ta ser ahusta cu un aumento cu di 4.5 miyon florin.

Durante tratamento di presupuesto den Parlamento luna pasa, minister di Finanzas a splica cu den e segundo cambio di presupuesto ta aloca tur locual ta riba 1% di e surplus, cual ta un di e normanan di supervision financiero cu mester a tene na dje. Den e cambionan aki ta aloca e fondo adicional di 92.5 miyon florin. Esaki ta duna un espacio di 46.5 miyon cu por bay pa reduci debe di Aruba.

E mandatario a indica cu aña aki gobierno di Aruba a paga 120 miyon florin na debe di pais Aruba, cual ta contribui na un reduccion di 600 miyon florin cu a paga.

Parti di e surplus ta bay tambe na extra inversion dunando un suma total 69 miyon cu por bay na inversionnan necesario pa pais Aruba.

Pa loke ta e costonan di ministerio di Finanzas y Cultura, e presupuesto ta splica cu pa bienes y servicio e calculacion di e cobransanan di banco ta excesivo y mester ser ahusta cu 450 mil florin menos. E diferencia, a sigui splica, lo ser usa pa renobacion di edificio di teatro Cas di Cultura (subsidio).

E parti di subsidio di proyecto bao di Directie Cultuur lo ser aumenta cu 450 mil florin suplementa pa renobacion di e edificio di Cas di Cultura. E cobertura ta bini di e agotamento di gastonan di banco.

Pa loke ta trata recursonan, e presupuesto ta indica, relacion cu impuestonan directo, cu mirando e tendencia actual di realisacion observa, e calculacion di e recursonan aki ta subi cu 20.7 miyon florin mas.

Den e caso di impuestonan indirecto, ta sigui splica cu mirando e tendencia actual di realisacion observa, e calculacion di e recursonan aki ta subi cu 20.2 miyon florin mas.

Pa derecho-, boetnan y otro, e presupuesto ta señala cu mirando e tendencia actual di realisacion observa, e calculacion di e recursonan aki ta subi cu 2.0 miyon florin mas.

Den e caso di entradanan no-impuesto, mirando e tendencia actual di realisacion observa, e calculacion di e recursonan aki ta baha cu 1.0 miyon florin. Y pa loke ta trata otro recibonan, mirando e tendencia actual di realisacion observa, e calculacion di e recursonan aki ta subi cu 60 miyon florin.

Pa loke ta trata ministerio di Husticia y Asuntonan Social, e presupuesto ta splica cu costonan di bienes y servicio, en conexion cu e proyecto di e Landspakket “Subversion administrativo’, ta inclui 263.500 florin. Parti di e calculacion di 123.300 florin di e item Mantencion di Edificio bao di Directie Social Zaken ta ser hala pa inversionnan na beneficio di e gastonan adicional di e renobacion di e edificio di Departamento di Asuntonan Social fase 3.

Den e caso di recursonan, entradanan no-impuesto, e presupuesto ta indica cu e fondonan ricibi caba cu ta suma 263.500 florin pa e proyecto di e Pakete Nacional “Subversion (administrativo)” ainda ta ser calcula.

Por ultimo, en conexion cu e gastonan adicional di e renobacion di e edificio di Departamento di Asuntonan Social fase 3, a agrega recursonan di 123.300 florin cu a ser transferi for di e articulo di Mantencion di Edificio bou di e Directie di Sociale Zaken.