Ayera merdia den un sesion ultracortico parlamento a aproba e proyecto di ley pa adapta temporalmente salario di parlamentario. E aprobacion a tuma lugar unanimemente y no tabatin deseo tampoco di e fraccionnan pa hiba palabra.
E adaptacion cu a haci pa e aña aki den salario di e parlamentario ta pa un total di 25%, reparti entre 162/3 porciento di e salario bruto y 81/3 porciento di vakantieuitkering pa e aña aki. E reduccion di salario ta efectivo pa e ocho lunanan final di aña, es decir di mei te, y inclusive december 2020.
E suma total cu lo spaar cu e medida aki, segun e proyecto di ley, lo ta Afl. 313.459,44. Mientras tanto, ta sperando riba gobierno pa loke ta e cambionan den presupuesto 2020, specificamente pa loke ta e salario di empleado publico y ministronan.
E ley cu a trata ta un ley di iniciativa di parlamento, cu tabata contempla originalmente un reduccion di salario di 10%, plus eliminacion di e vakantieuitkering di 81/3 porciento, loke a trece confusion cerca Raad van Advies, ya cu e no tabata cuadra cu loke gobierno tabata vocifera. Den e memoria adapta di e proyecto di ley a splica cu despues di consulta cu gobierno, a yega na e formulacion actual di total 25% (162/3%plus 81/3%).
Esaki ta cuadra cu loke a resulta di e informacion duna pa Promer ministro ayera mainta, unda a palabra cu gobierno di Hulanda, den reunion di Conseho di Ministro di iReino, pa reduci salario di ministro y parlamentario cu 25%.
