Diabierna mainta, hunto cu colega Edgard Vrolijk, nos a haci entrega di un ley di iniciativa pa cambia e “loterijverordening”. Esencia di e cambionan ta cu aworaki e lo bira posibel pa un di dos instancia haya permiso pa organisa weganan di Lotto.
Motibonan pa cambia e ley actual
Manera ta conoci “Fundacion Lotto pa Deporte” (FLPD)no ta contesta preguntanan di Parlamento di Aruba y asina ta impedi e organo pa eherce nan trabou debidamente. Ora ta trata presupuesto ta importante pa Parlamento tin tur informacion pa por tuma e miho decision pa alocacion di fondo pa deporte. Sinembargo FLPD ta nenga rotundamente pa contesta e preguntanan.
Na di dos luga ta obvio cu e mantencion di diferente facilidad deportivo ta laga di desea. Consecuentemente cu te hasta nos seleccion nacional no por competi na Aruba den nos stadionnan. Debi na e hecho cu mantencion no ta tuma luga.
Enfoce di e segundo fundacion
Manera e ley di iniciativa ta prescribi e enfoce di e fondonan cu e di dos fundacion lo genera mester ta riba mehoracion di facilidadnan existente y amplia posibilidadnan pa hobennan por haci deporte. E ampliacion aki mester ta den tur districto di Aruba. Adicional tur fondo mester wordo uza pa deporte den e sentido mas amplio di e palabra. Es decir, stimula deporte na scol, den bario pero tambe bou nos hendenan grandi. Tur esaki segun ta hancra den e programa di gobernacion y e plan di maneho di Minister Dangui Oduber.
Pa conlcui
Locual ta mas importante ta cu practicanan manera FLPD ta haci door di secuestra deporte y frustra un gobierno pa ehecuta nan maneho lo ta pa pasado. Es decir e segundo fundacion aki no lo por wordo secuestra door di ningun partido politico. Un fundacion di Aruba y pa Aruba. No obstante cua partido ta na mando.
