Cinco (5) aña pasa pais Aruba, bou liderazgo di Mike Eman, tawata conoce un deficit di 444 miyon florin. Esaki ta e mes momento cu liderazgo di Mike Eman a conduci cu Aruba a haya un Koninklijk Besluit (KB) pa mal gobernacion. Como fraccion di partido Movimiento Electoral di Pueblo nos ta satisfecho cu e liderazgo di sra.mr. Evelyn Wever-Croes ta transforma e practicanan di mal gobernacion di Mike Eman den uno positivo pa nos ciudadanonan.

Aruba bou liderazgo di Mike Eman
Mike Eman a cera presupuestonan ficticio for di 2014 te cu 2017 y asina perhudica un pueblo henter. E practicanan aki a bay asina leu cu te hasta “Algemene Rekenkamer” recientemente a cuestiona e maneho di Mike Eman caminda den nan rapport nan a señala cu tin mas di 10 miyon florin cu Mike Eman su Gabinete a uza di mas na 2016 sin duna cuenta. Partido AVP durante tratamento di presupuesto supletorio ta cuestiona un presupuesto “saldoneutraal”, manera “Raad van Advies” mes a señala. Pero partido AVP no a cuestiona un presupuesto supletorio na 2017 cu tawata tin mester di 130 miyon florin adicional pa entre otro e motibo cu Mike Eman a uza 142 mil florin di pueblo, cu no tawata presupuesta, pa celebra su hacimento di aña.

Presupuesto supletorio 2019
Pa e motibo cu CAft y “Raad van Advies” a splica cu Gobierno ta cumpli cu e norma financiero partidonan di coalicion no a haya necesario pa hiba discurso. Tambe algun siman pasa Parlamento a haya un splicacion amplio di Gobierno riba e “najaarsnota 2019”. Den e reunion aki Gobierno a splica (1) e desaroyo economico, (2) desaroyo di turismo, (3) realisacion di entrada di Gobierno, (4) Splicacion specifico di gastonan di cada Ministerio y (5) cu lo cumpli cu e norma financiero manera palabra.

Consehonan imparcial di CAft y “Raad van Advies”
“Raad van Advies” a conclui riba pagina 6 di nan conseho (RvA 157-19), bou capitulo 3, cu Gobierno lo cumpli cu e norma financiero manera palabra. E colegio di supervision (CAft), a conclui cu gobierno ta cumpli cu e norma financiero palabra. Literalmente nan ta bisa riba pagina 3 di nan conseho (CFT 201900163) cu e Presupuesto Supletorio ta “saldoneutraal” y p’esey nan ta conclui cu lo cumpli cu e norma financiero.

Pa conclui
E discurso di AVP awe durante tratamento di e ley no tawata di balor agrega. Na Hulandes tin un dicho ta bisa: “ Soms is praten zilver en zwijgen goud”. E discursonan hiba door di AVP tawata caracterisa nan practicanan anticua pa trata na recupera credibilidad di Mike Eman. Mike Eman a lidera un gabinete di cual un minister a wordo condena pa actonan coruptivo. Y un ex minister (Benny Sevinger) ta wordo sospecha actualmente pa soborno, estafa, mal uzo di su funcion, labamento di placa y falsificacion di documento. Te hasta Mike Eman, pa falta di credibilidad, a mal uza logo di Banco Central di Aruba na 2018, pa asina manipula pueblo a base di informacion incorecto.

Awe pa di dos biaha e Liderazgo di nos Prome Minister Evelyn Wever-Croes a conduci na e hecho cu pais Aruba conoce un presupeusto Supletorio “saldo neutral’. Caminda Mike Eman tawata traha presupuestonan ficticio y na fin di aña mester a pidi 444 miyon florin extra, awe e Liderazgo di Evelyn Wever-Croes a conduci cu nos conoce presupuestonan realistico y cu no mester di fondo adicional na fin di aña.