Ayera mainta a tuma luga e huramentacion di e parlamento nobo den presencia di su excelencia gobernador Alfonso Boekhoudt. 21 parlamentario a keda huramenta. Despues di 16 aña di tin un presidente y vice presidente den man di un solo partido, aworaki e presidente nobo ta den man di e partido MEP y un vice presidente bao un partido chikito (POR).
Ta hopi interesante di mira un parlamento nobo mas diverso y diferente segun comentarionan di diferente parlamentario y cu ta circula den comunidad.
“Pa nos esaki ta un momento historico sigur sigur,” tabata prome palabranan di parlamentario y lider di partido Red Democratico Ricardo Croes ayera durante su prome discurso den parlamento. Despues di felicita entre otro partido MEP y POR pa nan logro den parlamento, sr. Croes a sigui bisa cu pa partido Red esaki sigur tambe ta un momento importante. Mirando cu e partido e biaha aki lo forma parti di gobierno tambe y ta sinta na e otro banda di mesa di parlamento. Por a mira entre otro Richard Arends, Arthur Dowers, Mike de Meza y Michael Lampe sinta na e banda di oposicion reflehando e comienso di un otro trayectoria pa parlamento di Aruba. “Den bida bo tin cu tuma retonan pa bo progresa. Mi ta kere cu esey ta algo hopi importante pa mi pa hopi biaha sali for di bo ‘comfort zone’. Den e caso aki cu politica ta prome biaha cu mi ta tuma e espacio aki pero sigur trahando hopi aña caba atraves di cultura, musica y diferente projectonan inovativo. Ta sigur un honor pa por forma parti di e organo mas halto di nos isla cu ta parlamentario. Pa mi e reto ta sigur pa bay busca unda e posibilidadnan ta pa trece algo di mi banda cu ta representando toch no solamente hobennan, pero un parti grandi den nos comunidad cu ta busca semper pa wordo representa den un organo asina halto tambe,” Michael Lampe (AVP) ta declara na Bon Dia Aruba.
Presidente y vice presidente nobo
Ayera tambe a bay na e votamento pa eligi un presidente y vice presidente nobo di parlamento. Guilfred Besaril di partido MEP a keda escogi pa ta e presidente di parlamento pa e periodo transitorio aki cu 12 voto. Esaki lo ta e di dos biaha cu ta toca su persona den su carera profesional pa tin e honor di ta na cabes di e organisacion aki. Besaril: “Mi sa cu e ta un responsabilidad hopi grandi. ” Andin Bikker di partido POR a keda eligi como e vice presidente cu 12 voto. Nan lo ta encarga pa dirigi parlamento den e periodo transitorio aki te ora cu tin un otro gobierno cu lo cambia e constelacion di parlamento. Sr. Besaril a gradici Mervin Wyatt Ras y Rene Herde pa nan trabao durante aña di parlamentario nos tras, expresando durante su discurso cu: “Sigur e tabata un temporada dificil. Caminda cu tur ora nos no tabata riba e mesun liña, pero si mi ta kere cu tabata importante pa asina aki a desplega un trabao na beneficio di pueblo di Aruba.” A sigui na gradici tur e personal di parlamento pa y asina aki duna nan e honor cu nan merece di a sostene e presidente di parlamento anterior durante e periodo su tras. Esaki ta algo cu presidente anterior di parlamento Mervin Wyatt Ras tambe a expresa na Bon Dia, bisando nos cu: “Na e personal di parlamento mi ta gradici inmensamente pa e trabao cu nan a desplega.”
‘Hisa calidad di parlamento’
A keda tres ley atras cu no a wordo termina cual ta ‘functiehuis’, e ley di casino, ley di ‘deurwaarder’, pero tambe e ley di ombudsman. Falta conseho tocante staatsregeling pa asina e ley di ombudsman wordo trata pues e ta na su ultimo fase segun sra. Wyatt Ras. El a sigui expresa cu asina mester sigui pa mustra transparencia di parlamento pero tambe pa keda hisa e calidad di parlamento den e debatenan cu tin den parlamento. “Mi ta kere esey no tabata no solamente un reto pa mi pero pa tur otro presidente cu bin. ” Sra. Wyatt Ras a gradici tur su sostenedornan, famia, amigonan anto a bisa cu semper mester accepta critica y mira esey pa bo mehora manera di traha. Aworaki e ta como parlamentario den oposicion. El a expresa na Bon Dia cu:”Semper mi a traha di e forma cu ora mi bay mi cas mi ta drumi cu consenshi limpi. Pues esey ta mi mensahe na tur parlamentario, deseando nan y nan famianan hopi forsa y exito. “
