Parlamento no tin bista riba condicion pa prestamo; Parlamento uni den denuncia contra Hulanda

Gobierno no por acepta sin mas cu ta impone condicionnan desconoci, pero cu si ta mina autonomia di Aruba. Es mas, si mester yega asina leu, ta pueblo mester dicidi pa medio di un referendum. Esey ta locual a sali afo di e reunion informativo cu Gabinete Wever Croes a tene cu e organo legislativo.

Miembronan di fraccionnan di MEP, POR, RED, AVP y Parlamentario independiente Daphne Lejuez tur ta rechasa e actitud intransigente di Hulanda pa impone condicionnan cu pa nan ta desconoci, a cambio di e di tres tranche di e sosten di crisis.

Durante un reunion informativo, e mensahe tabata cla. No por permiti Hulanda falta Parlamento di Aruba respet, particularmente ora cu ta haci uzo di un necesidad sin precedencia pa impone locual segun Richard Arends di AVP, a bin ta purba desde 2010 caba.

E Parlamentarionan tur a bisa di ta sinti cu Aruba tabata cumpli cu tur e condicionnan cu Hulanda a impone. Lider di fraccion di MEP, Rocco Tjon a pidi consenso pa condena Hulanda, si mester internacionalmente. Y a critica miembronan di Tweede Kamer cu a duna sosten na Ministerio pa Asuntonan Interior y di Reino pa bin cu e proposicionnan sin cu nan mes a lesa e documentonan. Y ta un poder enorme ta kita di Aruba, a bisa. Pasobra asina cu forsa Gobierno di Aruba acepta e condicionnan, ta e Entidad Reforma Caribense lo por tuma decisionnan hasta den companianan estatal di Aruba, sin cu mester duna cuenta. “Kico ta resta di nos Statuut,” Tjon a puntra. “Nos ta na merced di Hulanda.”

Ricardo Croes di RED a mustra cu dignidad di Aruba ta den wega. E tabata bisto cu Hulanda no tabata kier e asina yama geschillenregeling. “Knops a mustra bon cla cu nos no por bay ningun otro caminda. Bosman di su banda a bisa cu e paisnan aki apenas tin 300 mil hende y na Hulanda nan ta 17 miyon.” Croes ta sinti si cu Aruba a permiti e situacion yega asina leu te pa permiti Hulanda abusa di un crisis pa mina nos autonomia y practicamente tuma e paso pa recolonisacion.

E fraccion di POR a uni na e palabranan di coleganan den Parlamento. Y lider di fraccion Dellanire Maduro a bisa di lo sostene un postura di protesta contra actitud di Hulanda. Su colega Alan Howell a bisa cu e ta un dia scur, pasobra no solamente ta papia di placa, pero e perdida di derecho como Arubiano. “Ningun Parlamentario Hulandes lo acepta un trato asina.”

Di su banda, Richard Arends di AVP ta di opinion cu semper tabata sa con Hulanda kier a caba e wega. Ta parce cu Hulanda na 2010 a baha rabia pa motibo cu no por a logra cu Grecia y Italia y awor cu Spaña y Italia. “Ademas. Hulanda no tin un idea con e relacion di mercadonan internacional y Aruba ta funciona. Aruba tabata e unico pais cu acceso na mercado financiero internacional. Ta debenan compleho cu si nos faya den paga, e companianan por exigi nan pago den un solo tiro. Mi ta duda cu Hulanda lo ta prepara pa esaki den un siman.” Su coleganan di partido, ex-Minister di Finanzas di AVP, Mike de Meza, Robert Candelaria y lider di fraccion Marlon Sneek tabata cla. Nan no por sostene e posicion intransigente di Hulanda, cu ta bay den direccion di kita tur derecho di Parlamento di Aruba.

Parlamentario Daphne Lejuez a bisa cu Aruba ta den un ‘catch 22.’ “Hasta si nos no bay de acuerdo, Hulanda por tuma cargo. Mi ta spera cu Prome Minister por convence Hulanda prome cu Diabierna pa laga nos wak e documentonan of por lo menos duna nos un resumen di e condicionnan, prome cu dicidi riba cualkier paso. E ta un falta di respet pa Parlamento pa keda sin duna informacion di asina embergadura.”