Manera cu por conclui for di e articulo acompañante den e edicion aki, nos ta awe na dia 28 di februari y ainda parlamento, asina leu cu nos averiguacionnan a yega, no a haya e rapport aki. Y esey no ta aceptabel, pasobra e rapport, cu ta contene e cifranan financiero di gobierno di e ultimo tres lunanan di 2017, a ser entrega na tempo na CAft, esta pa mita di februari di 2017. Es mas, CAft su secretariado a laga sa cu nan ta casi cla cu nan reaccion riba e raportahe aki. Y pa ley, parlamento mester haya copia pareu cu e rapport bay pa CAft. Kico ta tumando lugar aki? Tin algo di sconde, pasobra si nos no ta kiboca, mayoria di e desaster financiero cu e por tin aden, ta casi completamente obra di esnan cu a bay sinta na otro banda di sala di parlamento, mientras cu e mago financiero mes a hay escondite na un isla ruman. Esaki ta pa molestia oposicion solamente? Un sorto di ‘payback time’ pa loke e anterior gobierno a haci cu esnan cu actualmente ta den gobierno?

Laga nos ripiti un parti di e Editorial publica dia 12 di juni 2017, den pleno campaña, cu ta trata e manera di actua di e gobierno anterior den mesun asunto.

“Silenciosamente, gobierno pa di tantisimo biaha no ta cumpli cu ley. Mientras tin un obligacion legal pa entrega un rapport financiero pa mas tarda seis siman despues cu un kwartaal caba, siman cu a pasa ainda oposicion no a haya e rapport. Esaki mester a bay pa CAft y parlamento pa mas tarda mita di luna di mei. Gobierno a cumpli cu CAft si, pero laat, cu consecuencia cu nan a saca nan reaccion pa gobierno dia 2 di juni y a publica esaki riba nan website siman cu a pasa. Aparentemente e mandatario responsabel pa financia, ta irita pa e hecho cu CAft a publica su evaluacion di e rapport di gobierno sin warda riba e contesta di gobierno. Algo straño, pasobra esun cu no a cumpli ta ministro di financia, cu mester percura pa parlamento, inclusivo oposicion, haya e rapport di gobierno tan pronto cu esaki bay pa CAft. E punto ta parce cu gobierno no a haya nada di gaba den e ultimo rapport aki, y p’esey aparentemente a tene henter e asunto keto. Dia 21 di mei, casi un siman despues di e deadline legal, a manda e documento pa CAft. No a percura pa e copia pa parlamento, en todo caso di averiguacion cerca oposicion a resulta cu nan no a haya nada. Cu entrega laat na CAft, tambe lo kier a logra un reaccion mas laat, cu consecuencia cu pa e debate di KvK diahuebs pasa, no tabatin ningun comentario ainda riba e situacion financiero di e aña aki. ‘Games people play’ den tempo electoral?”

Te asina leu nos reaccion di como ocho luna pasa. Hopi cos a cambia; eleccion a bin te bay, y nos a caba di evalua e prome 100 dia di e gobierno nobo. Manera ta di comprende, den 100 dia tin hopi cos cu no a cristalisa ainda, y realmente e ta un periodo arbitrario pa huzga un gobierno. Ban warda te cu seis luna pasa, o algo por el estilo. Sin embargo, no mester warda ni 100, ni 10 dia pa stop di copia practicanan dañino di pasado. Ora gobierno no ta cumpli cu ley, e no ta brongosa su mes solamente. E ta insulta e ciudadano, y particularmente e parlamentarionan, esnan di oposicion y su mes banda di sala tambe. Pero tambe como prensa nos mester sinti nos ofendi cu e tipo di actitud aki, pasobra e ta stroba nos di haci nos trabao di informa pueblo debidamente. Pasobra no ta importa ki mal noticia e documento por tin, e ta e realidad cu nos tur mester biba cune, pasobra ta di nos cartera e solucion cu gobierno lo scoge, ta bin. Bon of malo cu e decision por ta, riba esey nos por debati prome, durante y despues, pero ta prerogativo di gobierno na mando pa indica nos den ki direccion nan ta busca e solucion, y nos lo mester carga e consecuencianan. Na ningun momento nos ta cuestiona e liderasgo cu gobierno tin pa indica nos e ruta pa solucion cu nan ta kere corecto, pero loke ta inaceptabel ta scondemento di informacion, cu pa colmo den e caso aki mester ta publico. Kico ta asina dificil pa simplemente percura pa e documento yega unda e mester yega, y duna cada parlamentario su copia? Claro cu nan ta bay comparti esaki cu prensa, esey ta nan bon derecho, independiente di cual partido ta den gobierno y cual ta den oposicion.

Pa nos como medio di comunicacion en todo caso ta absolutamente inimaginabel cu nos ta eherce critica pisa riba gobierno anterior ocho luna pasa, anto awe nos ta laga e mesun asunto pasa bay, haci manera nos no a ripara. Cu de paso nos ta defende e derecho di actual oposicion, ‘que sea asi’ pasobra nos no ta perde nos dignidad y credibilidad pa e asunto aki.