E luna aki e ley di presupuesto 2018 lo drenta parlamento. Unabes cu e concepto di ley aki drenta, e mester cana su caminda legal manera Raad van Advies, pa asina wordo trata den e organo legislativo aki entrante otro luna.
Parlamentario Endy Croes (MEP) a bisa cu a base di pregunta cu nan a haci na gobierno, nan ta compronde cu nan tin pensa pa trata presupuesto otro luna. Pues nan ta spera cu na cualkier momento e concepto di ley di presupuesto lo drenta parlamento.
“E lo wordo trata definitivamente den luna di april.” E parlamentario no a duna un fecha exacto riba e tratamento di presupuesto. Tambe nan tin un trabou pa haci entre nan esun di bay ministerio pa ministerio pa revisa locual a wordo presupuesta . “Un di e condicion tabata ta cu lo corta gastonan.”
El a laga sa cu un di e logronan cu e coalicion di gobierno lo a logra den 100 dia di gobernacion, tin di haber cu bahamento di gasto pa yega un presupuesto realistico. “Esaki tambe ta logronan. Nos ta bahando e gasto riba schouder di e gobierno aki.” Di e forma aki nan ta preparando pa bin cu un presupuesto descende y realistico”, segun parlamentario Croes.
El a ripiti cu locual nan a logra, banda di loke gobierno a haci, ta esun di stop un serie di contractonan entre nan esun di 1,6 miyon di florin di e auto di carera Team Aruba bou sponsor di ATA. Tambe un contract cu Tera Group pa 8 miyon florin y cortamento di mas cu 200 contract di empleadonan na servicio di ministernan di e gobierno anterior.
Parlamentario Croes a keda di bin cu mas informacion riba con media di su propio famia manera Canal 22 y Solo di Pueblo a wordo beneficia eventualmente cu avisonan di e agencia di publicidad Tera Group cu ta brinda servicio aki, y cu nan ta deal cu diferente media di comunicacion. E lo bay pidi un lista for di Canal 22, pa bin cu comparacion cu otro media ya cu ‘mi ta duda cu nan a haya’.
