Parlamento Hulandes di forma pura a aproba legislacion ayera sosteniendo e toque de queda na e pais despues cu un hues a duna orden pa elimina e medida e siman aki.
Awo ta spera cu lo debati e legislacion den Senado awe – e mesun dia cu abogadonan di gobierno ta bay corte pa apela e orden prohibiendo e toque de queda di 9pm te 4:30am.
Si Senado aproba e legislacion, e toque de queda lo keda na vigor y e decision di corte di apelacion lo bira en gran parti irelevante.
Maarten Hijink di Partido Socialista den oposicion a sostene e legislacion, pero a bisa gobierno: “No tuma e sosten como un apreciacion di e forma con e Gabinete aki a haci asina un desaster increibel di e marco hudicial di e toque de queda.”
E populista Geert Wilders tabata entre legisladonan di oposicion cu no ta sostene e legislacion introduci pa gobierno di prome minister Mark Rutte.
“Un berguensa pa prome minister Rutte, y un golpi pa e credibilidad di politica di corona di su gabinete en general y e toque de queda en particular”, segun Wilders, kende varios biaha a describi e medida como desproporcional. El a exigi ma cancela of paga back e multanan pa violacion di toque de queda.
Toque de queda, cu a duna impulso na protestanan luna pasa pero ta conta cu sosten y cumplimento amplio, ta keda na vigor pendiente e resultado di apelacion di gobierno.
Un hues na Den Haag a prohibi e toque de queda, bisando cu e ley cu gobierno a usa pa introduci e medida luna pasa por ser usa solamente den emergencianan urgente manera e kibramento masivo di un dam.
Gobierno ta argumenta cu e toque de queda a bira un necesidad urgente pa motibo di e aumento rapido di variantenan nobo, mas transmisibel, di e virus, particularmente esun descubri pa prome biaha na Reino Uni, cu ya a plama na Hulanda.
Rutte a bisa legisladonan ayera: “Claro, nos ta lamenta e situacion pasobra ta crea falta di claridad. Ta p’esey e Gabinete a purba di crea claridad lo mas rapido posibel via… e apelacion urgente contra e decision di corte y tambe e legislacion di cual nos ta papia.”
Hulanda ta den un lockdown dificil desde mita di december, cu tur tienda no esencial cera, hunto cu bar, restaurant y otro sitionan publico. Scol basico a habri back e luna aki, pero tur otro scol y universidad ta keda cera.
Infeccion ta reduciendo lentamente, cu e averahe semanal di caso nobo pa dia reduciendo durante ultimo dos siman, di 23.8 caso nobo pa cada 100mil persona, na 21.28 dia 17 di februari. E pais tin mas di 15mil morto confirma pa Covid-19.
