– Tweede Kamer na Hulanda a ricibi un ‘quick scan’ di e contenido di e acuerdo entre Pais Aruba y Citgo pa e refineria na San Nicolas. Sinembargo esaki no ta kita e duda di diferente fraccion den e proyecto.

E fraccionnan VVD, PvdA y Groen Links a trece nan dudanan dilanti durante un encuentro cu e minister responsabel pa Asuntonan di Reino, Ronald Plasterk. Di parti di Groen Links, parlamentario Liesbeth van Tongeren ta menciona daño ambiental como punto di preocupacion, cual a haya sosten tambe di su colega politico di PvdA, Roelof van Laar.  E ta bisa cu ni con ‘green’ e refineria lo mester bira, e lo keda emiti CO2 den aire, mientras un aña pasa Reino a compromete su mes na e encuentro internacional na Paris, di baha e cantidad di emision.

Na encuentro aki prome minister Mike Eman tambe tabata presente pa haci promocion pa Green Aruba como 100% sostenibel pa locual ta uzo di energia.  Segun parlamentario Van Tongeren e cuestion mester ta si den Reino mester habri un refineria nobo, pasobra esaki sigur lo no bay ‘genera energia di biento’.

E miembro di Tweede Kamer, André Bosman di VVD a comenta riba e consecuencianan pe finansa publico di Aruba. E ta bisa cu e gobierno Arubano ya ta conta riba e entradanan di e refineria den su presupuesto pero cu te awor ‘niun hende sa si esaki realmente ta algo realistico’. Sr. Bosman ta bisa atrobe cu gobierno Arubano ta uza diferente ‘triki’ pa yega na un presupuesto sostenibel sin kita ambtenaar, locual ta e gastonan mas grandi. E politico ta bisa cu ya e Fondo Monetario Internacional (IMF) a avisa cu esaki lo bay pasa den aña di eleccion. Asina gobierno di Aruba nunca lo yega na un presupuesto duradero, segun Sr. Bosman.

Den su contestanan minister Plasterk ta indica cu e organo di supervision financiero Caft lo bin cu un analisis riba e riesgonan di e proyecto di refineria. Caft a bisa Bon Dia Aruba 9 di december ultimo cu nan ta spera di haya tur informacion di gobierno den e siman binidero (locual ta siman pasa) y spera cu esaki lo bay Staten di Aruba tambe. Pa asina e analisis lo bira publico. Sinembargo te ainda esaki no a pasa.

Dump ilegal asbest – caso corte
Manera Bon Dia Aruba tambe a trece dilanti varios biaha ta e dump ilegal di asbest riba e tereno di e refineria cerca di e Fort Heuvelstraat. Gobierno a amplia esaki ilegalmente den e ultimo lunanan tambe pero te ainda e habitantenan di e caya no a haya niun claridad di gobierno riba preguntanan cu ta toca e consecuencianan pa nan. Te ainda niun instancianan di gobierno a actua tampoco. Un habitante a entrega un denuncia na polis riba locual Ministerio Publico (OM) a referi e persona aki bek na e instancianan di gobierno. Tambe nan a indica cu pa awor nan no por actua. E habitante no a bay di acuerdo cu e contesta aki y a reacciona den un carta bek. Den e caso cu OM ta sigui sin actua, y tampoco e otro instancianan di gobierno, e lo bay corte pa hues evalua e decision di OM etc.