Tweede Kamer ta haya gobierno Hulandes ‘naïef’ y no mucho realistico riba e situacion di Venezuela y su impacto pa e islanan Caribense den Reino.
Den parlamento tin preocupacion riba e influencia Venezolano riba e eleccionnan local y tambe e refineria na Aruba.
Nan no ta contento con ‘Venezuela a tuma over e refineria di Valero’ por medio di un compania cu ta den man di PDVSA. Lider di e fraccion D66, Alexander Pechtold a bisa nos partner den noticia Ret Karibense lo siguiente: “Esaki ta naïef. Un pais corupto y bancarota cu ta drenta por medio di un compania di PDVSA y haci daño.” E ta premira cu esaki lo trece un caso hopi dañino ambiental atrobe den Reino. “Atrobe 50 aña di miseria.”
Influencia Venezolano
Tweede Kamer tambe ta comparti e preocupacion pa e influencia Venezolano riba e eleccionnan na 2012. Nan ta referi na e noticia cu Venezuela a sostene e partido Pueblo Soberano na Corsou cu e tempo ey a gana e eleccion. Sr. Pechtold ta mustra ministernan Ronald Plasterk (Asunto di Reino) y Bert Koenders (Asunto Exterior) riba e echo tambe cu Venezuela ta pretende den su constitucion cu nan tin derecho riba e islanan Caribense Hulandes (Aruba, Corsou y Boneiro).
Sinembargo e politico ta haya cu Corsou mes mester soluciona e problema aki, den sentido cu influencia externo riba politica local ta un echo castigabel y cu e Ministerio Publico di e isla mes mester actua. E Ministerio a comenta cu nan no ricibi un keho y tampoco kier duna comentario riba casonan cu ainda ta den investigacion.
Pero e partidonan politico Hulandes kier sa mas riba e influencia Venezolano, entre otro si e eleccion actualmente na Corsou tambe ta influencia. E parlamentario Roelof van Laar (PvdA) ta haya cu den e caso e proceso di eleccion aki tampoco ta bay ordena, mester tene cuenta cu responsabilidad di Reino pa cu su ‘waarborgfunctie’. Reino tin su responsabilidad pa garantisa cu procesonan ta canando bon segun ley, regla y derechonan. E parlamentario André Bosman (VVD) tambe ta haya cu e asunto di influencia externo riba eleccionnan local ta un asunto di Reino.
Minister Koenders no a tuma contacto cu gobierno di Venezuela. E ta reacciona cu no tin suficiente prueba pa asumi cu e pais aki berdaderamante a influencia eleccionnan na Corsou.
Wardacosta
Parlamentarionan Hulandes tambe a expresa un biaha mas nan preocupacionnan riba e funcionamento di Wardacosta. Pero minister Plasterk ta comenta cu lo no reorganisa y tambe cu nan a aumenta e cantidad di patruya pa asina por interveni den e caso di refugiadonan Venezolano biniendo riba boto. Segun e mandatario e cantidad di refugiado ta ‘stabiel’.
Plan di refugiado ta keda secreto
Ambos mandatario Plasterk y Koenders no kier bay den detayenan riba preguntanan den Tweede Kamer con Hulanda ta prepara den e caso cu un masa di Venezolano lo yega e islanan Caribense pa busca refugio. Nan ta bisa solamente cu Hulanda tin diferente scenarionan prepara momento di e crisis tin un impacto grandi riba Reino. Sinembargo nan no kier bisa mucho mas pasobra e informacion ta confidencial y pa motibo cu e informacion asina por atrae refugiado.
Finalmente e parlamentarionan Hulandes a exigi cu nan gobierno lo informa nan mas amplio den un carta riba e topiconan di Wardacosta, e situacion na Venezuela y tambe riba e refineria na Aruba. Minister Plasterk a indica cu e lo cumpli prome cu lo trata e presupuesto 2017 di su departamento.
