Durante un entrevista cu vocero di Parlamento Hubenil David Quant y presidente Chloe Ruiz, e hobennan a elabora riba proyectonan actual cu e organisacion ta trahando riba nan. Tambe e organisacion ta spera cu e gobierno nobo cu sinta tene mas oido pa necesidad di hubentud.
Sr. Quant a expresa primeramente cu e ta contento cu mas y mas miembronan ta interesa pa trece nan amigonan den e organisacion. “Awo nos tin un grupo bastante grandi cu tin interes pa bira miembro, pues esaki ta hopi bon pa nos.” Esaki ta un desaroyo positivo despues cu pa algun tempo no a tende mucho di Parlamento Hubenil. Segun sr. Quant esaki tabata e caso pasobra hopi di e miembronan y tambe personanan dentro di e organisacion mes a bay afo pa sigui studia.
Actualmente mas hoben ta hayando sa kico ta Parlamento Hubenil, segun sr. Quant. E organisacion manera nos a yega di informa den pasado ta organisa tayer y charlanan pa asina desaroya e public speaking skills di hobennan.
Disponibel pa yuda parlamentarionan y gobernantenan
Sr. Quant a elabora tambe riba e deseo di Parlamento Hubenil pa loke ta trata un gobierno nobo cu lo sinta pronto. E preocupacion primordial pa e organisacion ta pa tin mas oido pa tende kico ta loke e hobennan den nos comunidad ta desea. Esaki mester pasa di manera proactivo, segun sr. Quant. “Nos tur por sinta na mesa y traha plan riba nos mes pero ey fo bo tin cu bay pa haya sa di berdad loke ta importante pa e hobennan.”
Esaki por pasa por ehempel pa medio di haci cuestionarionan, bishita na scolnan, etc. “Nos tin cu corda cu hobennan ta nos futuro, pues nos mester traha hunto pa asina traha pa hiba nos pais padilanti.”
Parlamento Hubenil sa colabora cu otro instancianan pa por yega na un miho maneho pa asuntonan cu tin di ber cu hobennan. Y nan lo ta dispuesto tambe pa colabora cu un gobierno nobo pa loke ta trata e aspecto di investigacion. “Nos mes despues di un debate a largo plazo sa haci nos resultadonan y asina nos ta saca afo informacion pa manda parlamento of manda gobierno.”
Un ehempel cu sr. Quant a duna ta e leerplicht cu tin awo, cual segun sr. Quant ta un iniciativa parcial di Parlamento Hubenil. “Nos a sinta cu parlamentarionan y gobernantenan riba e topico aki. Te dia di awe cu nos por bisa cu tin un leerplicht na Aruba.”
