Parlamento Hubenil ta bezig organisando algun actividad pa conmemora e Dia Internacional di Derechonan di Mucha e dia 20 di november unda lo tuma luga e Debate & Speaking Championship dirigi pa hobennan entre 12 pa 24 aña.
Dave Martinus presidente di e directiva di Parlamento Hubenil a informa na Bon Dia Aruba cu for di nan statuutnan ta pa duna e hobennan e oportunidad di expresa nan mes y expresa nan manera di pensa den un manera liber sin importa nan creencia, religion of preferencia, esaki ta haci cu pa nan como Parlamento Hubenil e dia aki ta hopi importante.
Den cuadro di 2022 e topico di e aña aki pa cu derecho di mucha ta papia tocante con comunidadnan na nivel mundial ta birando mas bieu y ta importante pa por tin un relacion entre hendenan grandi y hendenan hoben, e comunidad mes ta birando mas grandi, esey ta nifica cu nan mester por traha hunto pa e bienestar di cada un di e gruponan aki.
Loke nan a pensa pa por celebra e dia aki mirando e topico nan kier duna oportunidad na e hobennan pa nan por debati riba esaki formando ekiponan di debate di tres persona, nan ta bay tin e preguntanan pa por debati.
Tambe den e parti di oratoria (speaking) tambe ta importante pa motibo cu nan kier duna na e hobennan e oportunidad di expresa con nan ta pensa tocante e topico “solamente debati, pero tambe nan duna nan opinionnan y expresion di con e ta importante e topico riba su mes, esaki ta un parti importante den e desaroyo di e hobennan.
Martinus a señala cu hopi hende tin impresion cu esaki ta trata di hobennan cu ta bay bira parlamentario of minister, “semper esey ta e percepcion, pero Parlamento Hubenil ta para pa e desaroyo di e hoben den cierto balornan, pero tambe pa nan por expresa nan mes, como instrumento pa nan desaroya nan mes ta por ehemplo, e parti di siña con pa debati topiconan na un manera respetuoso treciendo argumentonan y di otro banda, zorg pa hendenan por trece un oratoria cu un topico dunando nan opinion y un bista di loke nan ta pensa den un cantidad di tempo”, el a bisa.
Ora cu e hobennan por logra esaki, no solamente nan por hacie si nan ta parlamentario of minister sino pa nan carera y e ta bay bira importante cu nan por papia di un manera organisa y di un manera respetuoso y scucha di otro hendenan nan opinion.
“Awendia nos ta mira hopi cu hendenan grandi ta pensa cu dunando nan opinion den un forma sin respet, ya ta debate y esey no ta debate, debate ta ora bo trece argumentonan, por tin diferencia di opinion pero, keda respetuoso treciendo argumentonan fuerte, pero awendia nos ta mira cu e linea a crusa caminda pa mi por gana e argumento mi mester falta bo e respet”, Martinus a declara.
