(TheVerge) – Weekend ultimo, Parlamento Europeo a vota pa aproba e propuesta inicial di un ley cu meta pa combati e practicanan invasivo di aviso di Big Tech. E parlamento a adopta e propuesta cu 530 voto na fabor, 78 contra y 80 abstencion.
E Digital Services Act, cu a keda introduci pa prome biaha na 2020, ta bay preveni plataformanan, manera Google Amazon y Facebook (propiedad di Meta), di usa informacion sensitivo, manera orientacion sexual, rasa, y religion pa avisonan personalisa.
E ta bay rekeri e servicionan pa duna usuarionan e habilidad pa facilmente opta contra tracking, y ta presiona plataformanan pa elimina contenido y productonan ilegal online, incluyendo lenguahe di odio y productonan di contrabanda.
“Cu un gran mayoria, Parlamento Europeo a adopta e Digital Services Act”, politico y parlamentario Hulandes, Paul Tang a skirbi riba Twitter. “Un gran victoria, cu sosten di iskierda pa derecha.”
E propuesta aproba tambe ta inclui dos regla riba cual Parlamento a acorda luna pasa: un prohibicion riba avisonan personalisa pa menornan di edad, y patronchinan scur (‘dark patterns’, un practica cu algun plataforma ta usa pa trick usuarionan pa bay di acuerdo pa comparti nan data. Cualkier compania violando e politicanan aki por enfrenta multa di hasta seis porciento di su ganashi global.
Manera Bloomberg a nota, e Digital Services Act ainda tin mas obstaculo pa surpasa; negociacionnan cu Conseho Europeo ta cuminsa dia 31 di januari. Democratanan Mericano a introduci legislacion similar siman pasa, cual tambe lo prohibi aviso personalisa si e keda aproba.
