Fin di aña pasa, Fundacion Gobernacion di Calidad (SDBA) a responde den un carta na un solicitud di prome minister, Evelyn Wever-Croes den cual a pidi nan contribucion pa e consulta riba e tema di deficit democratico den Reino. E fundacion sinembargo ta ilustra con e negligencia di Parlamento di Aruba pa cumpli cu su tareanan ta afecta mas pisa e deficit democratico.

SDBA (Stichting Deugdelijk Bestuur Aruba) ta di acuerdo cu tin deficit democratico na nivel di Reino, y cu eliminacion di esaki ta na su lugar pa un funcionamento menos contencioso di Reino. Pa esaki, segun e carta, ta necesario pa e estadonan miembro tin un nivel halto di obhetividad y habilidad critico cu ta enfoca completamente riba e interes comun di nan pais y esun di Reino. Sinembargo, si considera e practica di funcionamento di Parlamento di Aruba durante e mas di tres decada di Status Aparte, ta aparece un imagen cu mas matiz, cual tambe meste tene den consideracion pa un conseho balansa.

Si tene cuenta cu e tareanan na cual Aruba a compromete su mes na momento cu a firma e Constitucion, por nota cu no a cumpli cu varios di nan, of no a cumpli suficientemente. Entre otro, Aruba a compromete pa semper yuda mantene e Constitucion y boga pa e bienestar di Aruba; evalua presupuesto anualmente, parcialmente cu conseho di RvA; evalua cuentanan anual cu e responsabilisacion di gasto y entrada di e pais, cual mester entrega na ARA segun e Ordenansa Nacional (Lvo) – basa riba e cuentanan anual aki, e evaluacion di presupuesto ta tuma lugar y por haci ahustacion na e presupuesto pa e siguiente aña; establece regla pa maneho financiero di e pais cu proposito di un ehecucion responsable di nan tarea di supervision bao reglanan di Ordenansa Nacional; establece reglanan bao Lvo pa sigura e legalidad di e administracion y e efectividad di e maneho financiero.

Sinembargo, SDBA ta mustra cu no a cumpli, of a cumpli insuficientemente, cu e puntonan aki, pues Parlamento di Aruba sistematicamente a viola su responsabilidadnan.

Esaki tabatin consecuencia negativo, entre otro:
Finanzas publico y debe

E perdida total di control riba finanzas publico cu consecuencianan serio pa e formacion di debe di Aruba y e calidad di tareanan di gobierno, manera educacion y infrastructura. A pesar di yamadanan casi anual di Raad van Advies pa duna substancia na nan derecho di presupuesto, esaki nunca a sucede. E hecho cu Aruba nunca a entrega, menos procesa, un declaracion financiero aproba pa un accountant desde Status Aparte ta papia pa su mes.

Prioridadnan robes

Parlamento tampoco nunca a worry tocante problemanan importante manera patronahe politico, e falta structural di transparencia – no a actualisa website di Parlamento desde 2016 cu documentacion actual; e politica socio-economico deficiente, cual a causa cu Aruba a desaroya den un solo banda cu mercado di turismo y a neglisha casi completamente su deber social di cuido. Asuntonan doloroso manera embehecimento a keda convenientemente laga un banda, mientras por ehemplo a scoge e participacion irelevante den reunionnan di Parlatino. No ta coincidencia cu Aruba tabata e ultimo partner den Reino pa introduci e ley di financiamento di Partidonan Politico, mientras cu ainda no a formalisa legislacion importante, manera e ley di Ombudsman, of e tan admira Bureau di Integridad Aruba.

Siguiendo e stapnan di gobiernonan sucesivo di diferente color politico, Parlamento sistematicamente a faya, durante mas di 30 aña pa mara cualkier consecuencia na su propio advertencianan y di otro cuerponan internacional tocante e consecuencianan serio di cierto politica di gobierno. Parlamento tampoco a considera e cantidad di recomendacion frecuentemente emiti pa tur e cuerponan aki pa preveni consecuencianan dañino di politicanan di gobierno riba e poblacion y pa mehora e calidad di gobernacion den e sentido di mas amplio.

Extension di gobierno
 Manera mester ta obvio, Parlamento ta supposed di representa henter e poblacion y efectivamente controla gobierno. Sinembargo, varios estudio a mustra cu (mayoria di) Parlamento di Aruba casi no ta traha independientemente, sino ta sigui estrictamente e posicion di gobierno. Asina Parlamento ta funciona como un extension di gobierno y un representante di nan partido, y ta cuestionable na ki grado e parlamento ta añadi balor na nos sistema democratico. “Nos sistema politico ta desfunciona na grandi, pasobra bo tin un gobierno cu ta mal funciona, cu ta abusa di su podernan, cu ta comete patronahe politico, pero normalmente nan mester wordo controla door di Parlamento,” Armand Hessels di SDBA a comenta. “Pero Parlamento semper a aproba e tipo di cosnan aki. Semper bo ta wak cu oposicion ta critica cierto procedura, pero na momento cu nan partido ta den gobierno, nan ta aproba tur cos tambe.”

Pasobra cu mayoria di Parlamento semper a neglisha tur eror y a bay di acuerdo, nan ta mesun culpable pa mal gobernacion cu gobierno. “Un partido hopi biaha ta funciona, no na bienestar di comunidad, sino pa nan propio interesnan, sea personal of di partido,” Hessels ta bisa. “Nos conoce e famoso ‘friends and family’, y esey ta conta pa tur gobierno cu a sinta.”

Tambe por agrega cu e rapport di NIS-Aruba di april di aña pasa ta considera Parlamento como un di e vinculonan mas debil den henter e “cadena di integridad.” Esaki no ta un bon base pa e bon ehercicio di su debernan y posible participacion den un Parlamento di Reino.

Tur esaki ta ilustra cu tin un deficit democratico local, cual mirando e consecuencianan menciona, ta hopi mas serio cu loke ta discuti na nivel di Reino.

SDBA ta considera cu e deficit democratico na nivel di Reino ta importante, pero no ta e reto di mas significante. Ta duna prioridad mas urgente na mehoracion di e deficit democratico local. Mehoracion di esaki no ta un asunto exclusivamente politico, sino tambe ta rekeri un discusion publico, den cual pueblo di Aruba mes mester dicidi ki sorto di gobernacion ta uno cu por conduci na berdadero democracia na nos pais. Un sistema di gobernacion diferente, cu ta scoge e parlamentarionan totalmente diferente for di e gobernantenan, no tin ningun tipo di laso di partido, e ora ey automaticamente bo control ta bira hopi mas efectivo, segun Hessels. Sinembargo, sin participacion y involucramento di pueblo, e deficit aki no por keda soluciona.