Lider di fraccion di MEP a comenta na Bon Dia ayera atardi cu di nan parti como parlamento, nan ta di e opinion cu e begrotingskamer di Aruba mester bay hunto cu e continuacion di CAft pa asina den 3 aña Aruba su propio organo tuma e trabou di supervision financiero over.

Segun secretario di estado di relacionnan di Reino Raymond Knops, pa loke ta trata e establecimento di protocol pa bin cu un cambio den e ley di supervision financiero e envolvimento di parlamento mester tuma luga di parti di gobierno di Aruba. Asina sr. Knops a reacciona na e pregunta di un colega di prensa riba si Hulanda lo duna espacio na parlamento di Aruba pa loke ta trata e protocol aki durante un conferencia di prensa na representacion di Hulanda na Aruba (VNO) ayera.

Inclui parlamento responsabilidad di gobierno

“Mi ta kere den e rol di e parlamento, mirando cu mi mes tabata parlamentario pa 12 aña, pero mi persona di contacto ta e gobierno di Aruba, pues ta e gobierno mester percura pa inclui parlamento den e palabracionnan cu e haci.”

Pues e secretario di estado no lo por determina di ki manera ta inclui parlamento den e palabracionnan haci cu gobierno Hulandes, si no cu esaki ta responsabilidad di gobierno di Aruba. Te ainda no a bin ningun palabracion concreto pa loke ta trata e tema di supervision financiero y con lo establece esaki den futuro, pues e colegio di supervision CAft lo sigui te cu e partidonan yega na un conclusion con pa sigui den futuro.

Cumplimento pa baha gasto

Sr. Knops a ilustra cu si bo wak con e gastonan di gobierno di Aruba ta structura por mira cu tin 3 categoria di gasto: cobransanan di interes, gastonan di personal y gastonan general di gobierno.

“E sumanan di interes bo por influencia solamente si bo baha e debe, mientras pa baha e debe bo tin cu crea un surplus den e presupuesto y pa yega na esey bo por solamente subi bo entrada, pues impuesto of baha bo gastonan. Subi impuesto no ta eficiente pa economia pasobra bo no por haci esaki di manera indefini.”

Pa loke ta trata baha gastonan di personal, secretario di estado no ta kere cu den su reunionnan cu prome minister, minister di finanzas ni tampoco parlamento nan lo a defende un punto di bista cu no por tuma medida pa baha e gastonan di personal. Na e pregunta di kico lo pasa si pa fin di aña no baha e gastonan di personal cu 12 miyon, sr. Knops a reacciona bisando cu ‘mi no ta kere ta importante pensa di kico lo por pasa’.

Sr. Knops a splica cu e tin confiansa cu conhuntamente parlamento y gobierno di Aruba lo tuma medidanan necesario pa e deficit bira un surplus.

Pa Parlamento respeta estado di derecho primordial
Di parti di lider di fraccion di MEP Rocco Tjon durante su reunion cu sr. Knops pa loke ta trata e vencemento di e base legal pa CAft por existi, el trece dilanti cu pa nan como parlamentario ta hopi importante pa ‘respeta e estado di derecho’. Esaki ta referi specificamente na e protocol di 2 mei 2015 cual ‘practicamente a trapa riba e estado di derecho’.

Segun sr. Tjon te hasta Conseho Consultativo lo a expresa na e tempo ey cu e protocol y e ley aki ta contra e constitucion di Aruba mirando cu ‘den e protocol tabata bisa cu si parlamento pasa un ley cu ta desvia di e protocol nan ta bisa cu gobierno no mag di ehecuta e ley ey prome cu Hulanda autorisa esaki’. El a splica cu di su banda sr. Knops a expresa cu e ta compronde esaki y ‘el a garantisa cu e ta kere den un estado di derecho’.

E esfera cu a tene den e reunion aki tabata uno positivo, unda te hasta e topico di Aruba su propio organo di control pa presupuesto, cual sr. Knops a conta sr. Tjon cu e no tin niun problema cu ne mirando esey ta un responsabilidad di Aruba mes. Aunke no a bay den detaye di esaki, sr. Tjon a indica cu parlamento na su turno lo bay traha pa cristalisa e instituto di control aki di Aruba mes pa asina cumpli cu loke ta stipula den e programa di gobernacion cual e fraccion den parlamento ta sostene.

Di parti di parlamento sr. Tjon a conta cu nan opinion di parti di parlamento ta cu mirando cu mester extende e supervision financiero pa proximo aña mirando cu esaki ta caduca pa fin di 2018, e extension aki lo mester bay paralelo cu e begrotingskamer di Aruba pa despues di 3 aña Aruba tuma e responsabilidad aki over.