Ayera dialuna, 11 di december, a tuma luga den Parlamento di Aruba e reunion publico pa trata e presupuesto supletorio pa 2023. Esaki ta bira e di dos cambio den e presupuesto ya cu na mita di 2023 a haci e prome cambio of adaptacionnan y cu e cambionan aki di fin di aña, ta adapt’e na e cambionan final.

Prome Minister, Evelyn Wever-Croes, a splica den un comunicado cu e surplus ta mas halto di loke a premira cu, tabata na 1% y aworaki ta yegando 1.9%. Esey ta nifica cu e surplus ta subi di 60 miyon florin pa 112 miyon florin. Cu esaki, tin entrada extra di 50 miyon florin.

El a sigui splica cu segun e reglanan financiero e entrada adicional mester bay pa paga debe. E unico excepcion ta si mester inverti den proyectonan y e ora maximo e mita di e entrada extra por bay na e inversion di e proyectonan ey. Gobierno a dicidi pa inverti y a scoge algun proyecto cu kier a haci desde hopi tempo caba pero no tabatin fondo pa esakinan.

Entre otro, proyectonan cu lo haya inversion ta un post di brandweer, lo inverti den educacion y lo inverti tambe den e oficinanan di Parlamento, esey ta, entro otro, algun di e proyectonan cu lo bin.

E prome minister cu a tuma palabra pa contesta preguntanan ricibi for di e parlamentarionan tabata Minister di Turismo y Salud Publico, Dangui Oduber. Y kedando den e tema di surplus, Parlamentario di Fraccion MAS, Sra. Aquanette Gunn, a puntra Minister Oduber kico ta e factornan cu a conduci na e surplus di AZV di 34 miyon florin.

Oduber a splica cu danki na e crecemento turistico, cu ta traduci su mes na e crecemento economico cu ta traduci su mes na aumento di primanan di BAZV y tambe e primanan di AZV, esaki a conduci na un surplus den AZV e aña aki atrobe. Cu e surplus aki, el a indica, nan ta bay inverti den cuido medico pa aña 2024, pero mandatario no a duna detaye di e inversionnan specifico.

El a indica cu lo elabora den e presupuesto di 2024 unda tur ta bay haci inversionnan pa mehora e calidad di cuido y servicio.

Parlamentario Gunn tambe a puntra tocante e proyecto di hospital, un proyecto cu a conoce hopi obstaculo y cu ta rekeri di extra inversion pa por wordo finalisa. Minister Oduber a indica cu, manera Parlamentario Gunn a señala tambe, e proyecto di construccion di hospital “lo bay den historia como un di e proyectonan mas malo cu a planifica.”

E parlamentario a puntra ki dia ta entrega e proyecto aki, y na esaki Minister Oduber a splica cu aña pasa e pregunta aki a wordo haci y SOGA a indica na 2022 cu e proyecto lo wordo entrega dentro di 14 luna.

El a sigui splica cu e tempo tabata conoci pa gobierno cu e contract entre e contratista, cu ta OHL y SOGA lo termina na luna di februari di 2023. Gobierno a puntra SOGA e momento ey kico lo pasa ora e contract termina y ken ta e contratista cu ta bay entrega e poryecto, na cual SOGA a sigura cu nan lo prolonga e contract cu OHL y cu nan lo termina dentro di deadline cu a indica na gobierno.

Den luna di februari 2023, manera ta conoci caba e contract cu e contratista OHL a termina y SOGA no a prolonga e contract aki. E mandatario a indica cu ora luna di februari a yega nan no a ricibi ningun notificacion di SOGA y a asumi cu a contract ta wordo prolonga y cu nan lo cumpli cu e palabracion cu a keda haci.

Den luna di februari e contract a termina, consecuentemente e contratista, OHL a retira, a bin disputa entre SOGA y OHL, y SOGA mester a cuminsa e proceso di nobo y busca un contratista local pa caba cu e proyecto aki.

Pa loke ta e tema di cuanto falta pa e proyecto aki finalisa, Minister Oduber a clarifica cu ora cu SOGA bisa cu falta 10%, e ta referi na cu falta 10% di e suma di placa cu tin disponibel ainda pa caba e proyecto. Ora cu gobierno bisa falta 30%, e ta referi na cu falta 30% di e superficie pa e proyecto por keda cla.

E ultimo actualisacion cu Oduber a ricibi pa loke ta e proyecto di hospital ta cu e contratista local lo cuminsa cu e trabaonan entrante januari 2024 y lo termina e proyecto, si tur cos cana segun e planning cu nan tin y cu a acorda cu SOGA, medio 2025.

Pa loke ta e trata e anuncio recien di AZV tocante e cambio di maneho pa loke ta trata e testnan di sanger cu no por ser realisa mas na laboratorionan priva entrante 1 di januari 2024, Minister Oduber a ricibi e pregunta for di Parlamentario di Fraccion AVP, Sra. Mervin Wyatt Ras, y a splica cu pa tur test di dokternan di cas e pashentnan por keda acudi tanto na laboratorionan priva y tambe laboratorio di hospital.

Loke a cambia ta e maneho pa e testnan di ‘tweede lijn’, cu ta e testnan di specialistanan. E mandatario a splica cu prome cu e decision aki caba, 85% pa 90% di e pashentnan cu mester a realisa testnan di specialistanan tabata acudi na e laboratorio di hospital y pues AZV a bin cu e cambio den e maneho aki cu entrante 1 di januari 2024 tur e testnan di ‘tweede lijn’ ta wordo haci exclusivamente pa laboratorio di hospital.

Durante e reunion cada minister a duna splicacion y a contesta pregunta di e parlamentarionan. Por lesa mas di e reunion publico ariba e cambionan di e presupuesto supletorio 2023 den nos edicion di mañan.