Apart di e diferente instancia cu ta brindando nan ayudo pa atende cu e calamidad cu e horcan Dorian a laga atras na Bahama, Parlamentario Endy Croes kende a bay atende un reunion di Parlatino (Parlamento Latino Americano) na Panama, na final di e reunion el a trece un mocion dilanti pa yuda cu e situacion na Bahamas.
Parlamentario Croes kende a bay representa Presidente di Parlamento di Aruba a declara cu pa medio di su mocion el a pidi na e 23 paisnan cu ta forma parti di Parlatino pa conhuntamente traha un carta di convivencia pa e sucedido cu a tuma luga na Bahamas. Pues nan ta 23 Parlamento of Presidente di Parlamento presente den e organo aki
Aunke por ta cada gobierno di e paisnan ariba nan mes por a manda un carta di convivencia, pero como Parlatino nan a manda den conhunto un carta oficial na e gobierno di Bahamas. E carta aki a wordo aproba unanimamente, el a bisa.
Segun Parlamentario Croes, e imagennan cu ta wordo transmiti despues cu e horcan Dorian a castiga Bahamas, ta ‘touch bo curason como ser humano.’ E mes cu tin basta amigo den e mundo deportivo di softball na Bahamas ta haya su mes hopi tristo di locual a tuma luga. Pero no solamente su persona, sino cu e imagennan aki a shock henter mundo di locual a tuma luga na Bahamas.
