Ayera merdia Parlamento di Aruba continua cu tratamento di e presupuesto nacional 2025. Manera ta conoci e tratamento di presupuesto a cuminsa dia 7 di maart, pero a keda rapidamente suspendi despues cu fraccionnan AVP y Futuro a entrega nan amienda pa asina manda esaki pa e organonan consultativo pa conseho.
Despues di huramentacion di parlamentarionan nobo y di Gabinete AVP-FUTURO, trabou a cuminsa di biaha ya cu ayera merdia parlamento a continua cu tratamento di presupuesto nacional 2025.
E presion ta un poco pisa teniendo na cuenta cu pa ayera mes mester a trata y aproba e presupuesto den su totalidad ya cu 31 di maart, fecha deadline pa trata y aproba presupuesto ta eynan mes, dialuna pa ta exacto.
Manera ta conoci tabatin un tardansa pa por a cuminsa cu tratamento di presupuesto. Esaki a trece preocupacion pa e Colegio di Supervision Financiero di Aruba (CAft) ken pa motibo di e tardansa pa trata e presupuesto a manda un carta di aviso pa parlamento y pa gobierno, pidiendo atencion pa trata e presupuesto, prome cu 31 di maart.
Como cu CAft no a haya un contesta riba nan carta di aviso di parti di parlamento, nan a escala y a hiba esaki na Conseho di Minister di Reino cu na su turno a e instruccion na Aruba pa percura pa trata e presupuesto 2025 prome cu 31 di maart.
Aunke esaki tabata un advertencia, esaki ta algo cu no lo a trece sancion directo pa Aruba, pero si lo por tin tabatin consecuencia si no lo a sigui e instruccion di Conseho di Minister di Reino y CAft.
“Esakinan no ta sancionnan directo den e sentido cu ta alerta Conseho di Minister di Reino. Pero nan ta enberdad consecuencianan, nan ta consecuencianan y cu esey e pais na final ta haci su mes daño, pasobra mester paga mas. Bo no por refinancia e fiansanan, bo no por drenta den contratonan nobo, y esey naturalmente no ta loke bo kier, y esey finalmente no ta bon pa e habitantenan di Aruba tampoco. Ya caba mi por scucha Aruba ta bisa, nos no ta haya ningun castigo di tur manera. P’esey nos mester preocupa,” presidente di CAft, Lidewijde Ongering a indica na e portal Noticia Cla anteriormente.
Parti di e tardansa pa continua cu e tratamento di presupuesto tabata debi na cu mester a warda riba e conseho di e organonan consultativo riba e amienda entrega pa fraccionnan AVP y FUTURO. Una bes cu esakinan a keda cla, a anuncia cu acuerdo di gobernacion a keda cla y a anuncia formacion di Gabinete AVP-FUTURO y ken ta e ministernan cu lo forma parti di e gabinete aki.
Teniendo esaki na cuenta, mester a tuma espacio pa tanto ministernan como e parlamentarionan nobo por a huramenta pa asina por a continua cu e tratamento di presupuesto. Diahuebs mainta parlamentarionan nobo a huramenta, ayera mainta Gabinete AVP-FUTURO a huramenta y di biaha ayera merdia a tene e reunion publico pa continua cu e tratamento di e presupuesto nacional 2025.
Manera a keda anuncia dia 7 di maart, e amienda entrega pa fraccion AVP y FUTURO a practicamente “bolter” e direccion di e presupuesto. E cambionan mas grandi cu tin den e amienda a entre otro aumento di reparatietoeslag pa pensionadonan cu 250 florin pa luna entrante 1 di mei 2025, reduccion di accijns cu 10 cen riba gasolin entrante 1 di mei di 2025, educcion di goederen en diensten cu 10% y aumento di subisidio pa Funacion Pa Nos Comunidad na 500 mil florin.
E tratamento di presupuesto a tuma un cantidad di ora y pa momento di cierre di nos edicion ainda e reunion publico no a termina. Keda pendiente pa lesa informacion detaya di e reunion publico den nos siguiente edicion di Bon Dia Aruba.
