Parlamento di Aruba a aproba presupuesto 2025 di forma unanime

Diabierna merdia Parlamento di Aruba a continua cu tratamento di presupuesto nacional 2025, despues di huramentacion di Gabinete AVP-FUTURO. Despues di un reunion largo cu a termina despues di 12or di marduga, na final parlamento a aproba di forma unanime e presupuesto di pais Aruba pa aña 2025.

E tratamento aki sigur tabata uno cu a bay den un forma peculiar mirando cu un gabinete nobo, AVP-FUTURO, mester a trata un presupuesto cu nan no a traha, pero cu e gabinete anterior, Wever-Croes II, a traha. Pero e amienda entrega pa fraccion AVP y FUTURO a cambia e direccion di e presupuesto y pues esaki tabata den gran parti loke tambe e ministernan nobo a trata.

Despues di e prome tanda di pregunta, minister di Finanzas, Economia y Sector Primario, Geoffrey Wever, a contesta e preguntanan di diferente parlamentario.

Prome preguntanan cu e mandatario a contesta a bin di parlamentario Mike de Meza cu a remarca e necesidad pa inversion pa San Nicolas y area pariba di brug cu pa hopi tempo no a haya atencion debido y a puntra ki plan tin pa San Nicolas y su desaroyo.

Minister Wever a splica cu ya caba tin un plan di 4.3 miyon florin cu ta den ehecucion den e area rond di post kantoor. Esaki ta un proyecto cu a ser diseña bou di gobierno anterior pa crea un area agradabel den e curason di San Nicolas y e fondonan aki ta den presupuesto.

Referiendo back na e acuerdo di gobernacion, el indica cu den esaki ta elabora ampliamente riba e plannan cu gabinete AVP-FUTURO tin pa San Nicolas, cu ta un plan di inversion integral cu una bes cu tur minister di gabinete nobo ta aloca por cuminsa prepara e ehecucion di e plan aki.

Parlamentario de Meza a puntra con ta bay controla costo di bida y inflacion, na cual e mandatario a splica cu den e acuerdo di gobernacion tin un plan di mehoracion di poder di compra y tin un plan di reduccion di costo di bida. Aunke e mandatario a referi na acuerdo di gobernacion, e no a splica cu detayes kico e plan ta encera.

Contestando otro pregunta di parlamentario de Meza tocante con ta bay cumpli pa e surplus yega na tur hende, minister Wever a indica cu esaki ta un pregunta valido y cu e plan di mehoracion di poder di compra y plan di reduccion di costo di bida ta e base solido pa esaki.

El a agrega cu pa ehecuta e plannan aki mester tin fondo y hustamente esey ta e meta, pa percura cu e fondonan publico, fondonan cu awe nan ta yama parti di surplus por yega back na e ciudadanonan.

Minister Wever a ricibi pregunta tambe di parlamentario lider di fraccion MEP, Evelyn Wever-Croes ken a vocifera su preocupacion pa e cambio den e presupuesto cu ta afecta FCCA y fondonan cu tabata destina pa construccion di casnan social pa esnan di menos recurso.

Minister Wever a splica cu diferente miembro di fraccion di MEP a vocifera nan preocupacion of desaprobacion di e hecho cu e trek in e di dos cambio. El a sigui splica cu e motibo no ta cu nan no ta kere den FCCA of den construccion di casnan social, el a remarca cu nan ta kere si cu ta keda na e gabinete nobo pa dicidi con ta bay haci esaki, ki tipo di vivienda ta bay traha y mester tin espacio pa por dialoga cu tur stakeholders, entre otro, FCCA.

El a indica cu esaki ta parti di e plan y den acuerdo di gobernacion tin un agenda di inversion cu ta hiba na un pregunta cu diferente miembro di parlamento a haci tocante e aumento di 30 miyon pa inversion.

E mandatario a splica cu esaki tin di haber cu tur e consehonan cu gobierno a ricibi den añanan anterior, por ehempel di CAft y Raad van Advies, den cual ta nota cu gobierno mester percura pa tin un agenda di inversion riba termino largo cu ta indica mester indica unda gobierno ta bay y kico ta e meta di e pais.

“A tuma e consehonan ey hopi na serio y nan ta forma e base di e acuerdo di gobernacion y pa e motibo ey a percura pa acorda cu ta bay bin un plan di inversion, e creacion di un fondo di inversion cu un plan di inversion multianual cu por bisa unda nos kier hiba nos pais y no traha ad hoc di proyecto pa proyecto sin tin un vision holistico concreto a termino largo,” el a subraya.

El a agrega cu tin diferente plan cu AVP-FUTURO ta kere ta bay ta na bienestar di desaroyo social economico di e pais cu e perspectiva cu e mester inclusivo caminda tur hende den sociedad ta haya participacion. Den esaki, el a enfatisa, ta inclui un punto specifico pa construccion di cas social duradero.

Parlamentario y lider di fraccion PPA Otmar Oduber a entrega un mocion den cual ta menciona con ta bay stimula e mercado digital, e sector tecnologico di Aruba, mencionando entre otro paypal, cryptocurrency y diferente otro iniciativa.

Minister Wever a aplaudi e mocion di parlamentario Oduber a indica cu esaki ta parti di e plan di gobernacion tambe. El a splica cu e puntonan menciona ta puntonan cu e gobierno tin den e plan di gobernacion y e base pa e plan aki ta den ehecucion.

El a menciona cu den e gobierno anterior el a acerca e departamento di ECLAC di Nacionnan Uni pa yuda desaroya e e sector tecnologico di Aruba. El a splica cu a acerca nan como conseheronan internacional y nan ta trahando e roadmap con por implementa e tecnologia aki na Aruba, kico di leynan tin cu cambia, con ta haciele cu e stakeholders, etc.

Oduber tambe a entrega un mocion tocante vacation rentals y ta menciona cu eynan tin hopi entrada cu pais Aruba por haya, con por cobra impuesto na e no residentenan, con tin cu desmotiva no residentenan pa cumpra casnan y converti nan den vacation rentals, entre otro.

E mandatario a splica cu esakinan ta puntonan cu tambe ta poni den e acuerdo di gobernacion cu ta parti di e plan di campaña, pero cu ta ser honra den e acuerdo di gobernacion y ta poni bou di e parti unda ta bisa cu kier crea mas espacio financiero sin cu mester cobra impuesto na esnan cu nan no kier cobra impuesto.

El a splica como ehempel, cu ta elabora con ta pensa di haci esaki, y den esaki lo evalua y stimula contribucion fiscal di vacation rentals. Entre nan a papia di ahustacion di grondbelasting pa no residente, un maneho caminda ta bisa cu e no residente no ta haya permiso pa converti un hogar den vacation rental, entre otro.

“Esaki tin cu bay den un forma holistico, den un forma integral, cu ta incorpora diferente ministerio…Tin diferente aspecto cu mester ser evalua,” e mandatario a enfatisa.

Lesa mas detayes di reunion publico di tratamento di presupuesto den nos siguiente edicion di Bon Dia Aruba.