Siman pasa e cambio di ley di inkomstenbelasting a wordo aproba. Awo e ta inclui cu por deduci tanto e pago como e interes di un fiansa di estudio.
Te cu 2015 solamente e interes por a wordo deduci, pero awo por deduci e pago tambe. E ley aki cu a wordo aproba, tambe ta inclui un rebaho di 35% na esnan cu tin un fiansa di estudio di Aruba, segun Minister Angel Bermudez a splica. Esaki ta conta solamente pa esnan cu paga e debe aki den un solo pago.
Tambe e mandatario a indica cu den caso cu un studiante no bolbe Aruba bek y keda biba den exterio, esaki ta facilita nan pa no keda 15 pa 20 aña ta paga e fiansa aki bek. Pues nan tambe ta haya e facilidad y descuento pa paga den un solo biaha.
Di otro banda esunnan cu bin bek y cu registra na Aruba despues di nan estudio tambe por bin na remarke di e 35% di descuento cu antes tabata e parti di ‘beurs’ cu nan tabata haya. “Esaki ta reduci e debe total cu nan tin y nan ta haya un areglo di pago cu segun e ley aworaki, ta di 15 aña cu un interes di 2%”, e mandatario a sigui informa. Minister Bermudez a indica cu Departamento di Direccion di Finanzas den e proceso aki a inventarisa henter e cartera di fiansanan cu gobierno a otorga den e ultimo 30 aña, cu ta un suma di mas cu 400 miyon florin. “Actualmente nos sa precisamente ken debe cuanto y pa esaki nos a institui tambe un afdeling special na Direcion di Finanzas pa esaki”, e mandatario a expresa. Den e siguiente lunanan, e departamento aki cu awor ta conta cu un programa digital pa administra y procesa henter e cartera aki lo factura tur ‘statements’ lo informa tur studiante y ex studiante cu a ricibi fiansa di estudio, kico exactamente nan debe, kico ta e condicionnan, e terminonan cu nan por tene nan mes na dje pa e debe aki y kico ta nan obligacionnan pa e fiansanan cu nan a haya.
