Aunke awe ta e dia cu nos ley ta wordo stipula pa gobierno entrega su presupuesto 2018, te ainda no tin mucho informacion con leu nan ta cu esaki. Te ayera mainta parlamento ainda no tabata sa ki dia gobierno lo entrega e ley aki pa cuminsa su caminda den parlamento.
Lider di fraccion di AVP, Marlon Sneek a declara cu ainda nan no tin un bista ki dia gobierno lo entrega su ley di presupuesto 2018. “Parlamento no a ricibi nada ainda den e caso aki for di direccion di gobierno”, el a bisa.
Sinembargo el a declara cu loke nan a haya informacion di e trayectorio di e presupuesto ta cu algun luna atras e tabata den man di e departamento cu ta encarga pa hinca esaki den otro. Pero con leu e ta y si nan a bin cla cu ne of si e ta yega parlamento awe 1 di september, e no por bisa nada. Ya cu te ayera mainta nan no a haya nada oficial for di gobierno.
Bon Dia Aruba tambe a cumpli cu su trabou di tuma contacto cu oficina di minister di Financia pa haya mas informa riba e trayecto di e ley di presupuesto y con leu e ta pa entreg’e na parlamento, pero te ainda nos no a haya ningun reaccion.
