Despues di un reunion maratonico ayera, Parlamento a aproba e proyecto di ley cu gobierno a pone pa aprobacion na consideracion di Parlamento, pa autorisa poder ehecutivo pa yega na un convenio cu e grupo di companianan Citgo, pa termina e contrato firma na juni 2016 pa e gobierno di e tempo ey, pa reinicia operacion di e refineria y terminal di crudo.

Despues cu e reunion tabatin su momentonan tumultuoso, cu bastante boroto di tanto parlamentario y mandatarionan presente, presidente Adi Thijsen a yega na recorda e presentenan cu e tin autoridad amplio pa pone orden, si mester via e opcion di obliga persona bandona sala. Despues cos a calma mas, aunke e bandanan a trece dilanti e relacionnan cu ambos tabatin cu figuranan prominente di e regimen Chavista, entre nan Diosdado Cabello y Freddy Bernal, ambos riba e lista publica recientemente pa gobierno Mericano, cu recompensa di 10 miyon dollar pa informacion cu ta conduci na nan captura. Di otro banda a mustra riba relacionnan cu hende manera Jose Roberto Rincon, actualmente cera na Merca pa corupcion relaciona cu Pdvsa, cu a haya fabor dudoso di gobierno anterior.

Di banda di oposicion a trece dilanti nan obhecion pa termina e contract, basa entre otro riba e pensamento cu si tabata posible pa haya compensacion di parti di e consorcio Citgo. A argumenta tambe cu ta contradictorio cu den tempo di crisis financiero ta bay di acuerdo pa cede tanto centenares di miyones di dollar na Citgo, mientras mester busca centenares di miyones di ayudo na y via Hulanda pa enfrenta e crisis di coronavirus actual.

Di banda gubernamental ta insisti cu no por warda mas riba un proceso cu por dura varios aña pa termina e contract di e forma prescribi den e convenio original, y cu e situacion deplorable di e instalacionnan ta urgi atencion inmediato. Tambe ta argumenta cu ta urgente pa busca operador nobo pa e refineria y e terminal di crudo.

Durante votacion den oranan di anochi e ley a haya aprobacion cu 11 pro y 8 voto contra. Miembro independiente di parlamento Daphne Lejuez tabata ausente.

A adopta tambe un mocion di banda gubernamental pa dentro di 4 siman directiva di Refineria di Aruba NV bin splica parlamento tocante e resultado di e investigacion forensico, unda supuestamente ta trata di desviacion di alrededor di 21 miyon florin na gasto no relaciona cu e metanan empresarial di e compania.

Tambe tabatin mocion aproba pa pone mas atencion na e aspectonan di medio ambiente den e proceso di busca un futuro pa e propiedad, y relaciona cu esaki tambe un mocion pa urgi gobierno pa termina legislacion riba tereno di medio ambiente, pa esaki por keda trata den parlamento.

E aprobacion ta encera cu awor gobierno por finalisa e negociacion cu consorcio di Citgo, unda ta cede tur acreencia cu gobierno y Refineria di Aruba NV tin, y ta haya e suma di Afl. 28,8 miyon na debe di Citgo na impuesto.