Prome Minister Evelyn Wever-Croes den Parlamento a splica con e historia di RdA tabata y e falta di control cu tabatin.

RdA ta un compania cu a wordo lanta dia 30 di september 2016.

E directiva e tempo ey, y hunta di comisario e tempo ey y e minister e tempo ey no kier a registra e nomber di e comisarionan cu mester a supervisa e compania pa Gobierno, segun un comunicado di gobierno. Esaki ya caba e compania a cuminsa cu mal pia. Dicon sconde ken ta den hunta di comisario?

Prome biaha cu e miembronan di e hunta di comisario a wordo registra tabata dia Prome Minister sra. Evelyn Wever – Croes a tuma over e cartera y a cambia e hunta di comisario. E ‘fiestanan’ a caba na momento cu a pone personanan capas na cabes di supervision di e compania. Cada un di e miembronan nobo a haya un map di e compania cu documentonan di e reunionan cu a tuma luga di e hunta y shareholders (4 reunion solamente), sinembargo realidad ta cu tabatin hopi mas reunion a tuma lugar. Dicon a sconde esakinan tambe?

Hasta na momento di traspaso di un hunta pa e otro, e directiva di RdA a nenga di duna e hunta nobo tur documento cu tabata necesario na e memento ey pa nan haci nan trabao.

Aki por a mira cu tabatin scondemento di informacion.

E hunta tabata consisti di e comisarionan cu ex minister Mike de Meza a nombra. E personanan aki ta esnan mas responsabel pa tur locual cu a tuma lugar den e compania, pasobra nan no a haci nan trabao manera cu mester a hacie. Esaki ta conta pa e Minister en cuestion cu tampoco a traspasa e informacion manera debe ser na actual Prome Minister.

Durante e investigacion forensico a bai cu computernan. Computernan cu un persona cu ta traha na RdA a delete tur files, of asina el’a kere! Pero investigadornan a logra a traves di hard drive, di computer di director di e compania, pa haya mas documento den cual por mira cu ex Minister sr. Mike de Meza tabata encabesa varios di e reunionnan “secreto”nan aki.

E scondemento di informacion, e falta di transparencia y hasta sospecho di falsificacion di documento, a wordo investiga y lo sigi wordo investiga. Y talves esaki lo pone cu ex minister Mike de Mesa tambe por wordo marca como sospechoso.