Minister di Salud Publico a presenta 2 ley di salud na Parlamento. Durante e tratamento di leynan aki, a adapta e ley di malesanan contagioso, cual tabata necesario teniendo cuenta cu e malesanan cu awo ta conoci na nos isla. E ley aki parlamento a aproba y tambe esun otro di privatisacion di Landslaboratorium.
Esaki ta informacion for di dos relatonan di parti di minister di Salud Publico.
Durante sesion di parlamento a trata dos ley cu ta regarda salud publico. E prome tabata mas bien un adaptacion di e Landsverordening Besmettelijke Ziekte (malesanan contagioso) y e di dos tabata trata privatisacion di Landslaboratorium.
En realidad e Landsverordening di Malesanan Contagioso ta un adaptacion mirando cu tin diferente enfermedad cu ta cay bao di e categoria aki cu a drenta Aruba e ultimo añanan y tambe mester proteha contra loke tin eyfo y cu no a yega Aruba ainda. Ora cu e enfermedadnan manera Chikinguya y Zika a lanta cabes, loke cu a haci ta traha un Decreto Gubernamental den pura, pa por a atende inmediatamente cu nan ‘awor nos a hinca nan den e Landsverordening hunto cu esun di Ebola di Africa’, e mandatario a splica.
E di dos ley trata pa loke ta salud ta e traspaso di Landslaboratorium pa Hospital. “Aki tabatin varios pregunta. Mas tanto riba e condicion di e trahadonan. Tabatin algun cu tabata al caso, pero otronan cu no tabata tin nada di haber cu e topico, pero nos a atende cada un di nan”, asina e mandatario a amplia. “Pa loke ta trata e trahadonan, mester bisa cu tin diferente factor hungando un rol. E proposicion cu nan a haya ta basa riba estudio di mercado, un contract basa riba mercado liber,” minister ta aclaria.
“Landslaboratorium awor a bira un organisacion riba su mes cu ta cay bao di hospital y e trahadonan tin cu bay over den e mundo di laboratorio di mercado priva pa asina nan por ta mas competitivo”, e ta agrega. “Esaki ta implica cu e trahadonan cu dicidi di sigui lo bay atras pa cierto cosnan cu nan tabatin como ambtenaar, pero nan lo bay dilanti pa loke ta trata e parti financiero.”
E ta sigui bisa cu en general e ta un bon deal, pero tabatin di e trahadonan cu a uza e ocasion pa cambia di rumbo di trabao, pasobra cu nan no kier traha warda mas. “Asina tabatin diferente motibonan pa of bay over den e organisacion nobo, bay otro departamento of tuma un pakete.”
Den e areglo nobo nan mester yega na cierto cualificacion pa e metanan di calidad cu lo haci entrada otro aña unda cu tur laboratorio na Aruba lo mester bay cumpli cu cualidadnan minimo stipula pa Departamento di Salud Publico y AZV. “Con cu bay bin nos tin e responsabilidad como Gobierno y esey nos a bisa Parlamento tambe si ta un ta bin bek, 20 ta bin bek, nos tin e deber di busca un funcion pa nan den Gobierno.”
